ZAIDI YA WATU 14,000 KUNUFAIKA NA MRADI MKUBWA WA MAJI KWADELO

Posted on: July 1st, 2025

Mwarobaini wa Adha ya Maji katika Kijiji cha Kwadelo umepata Suluhu ikiwa ni baada ya Uzinduzi wa Mradi mkubwa wa Maji kijijini hapo.

Haya yanajiri ikiwa ni baada ya kukamilika kwa Mradi mkubwa wa maji uliogharimu Jumla ya Tzs Mil 292 kwa Ufadhili wa Kampuni ya Vinywaji ya  Serengeti Breweries ukitekelezwa kwa ushirikiano wa Wakala wa Maji Mijini na Vijijini (RUWASA)na Taasisi isiyo ya Kiserikali ya AFRICAI ambao umezinduliwa na Mgeni Rasmi Waziri wa Mifugo na Uvuvi na Mbunge wa Jimbo la Kondoa, Mhe.Dkt Ashatu Kijaji mapema Juni 26,2025.

Akizindua Mradi huo Mhe.Dkt Ashatu amesema mradi huo wa maji umetatua changamoto ya maji iliyokua ikiwasumbua wananchi kwa kuhatarisha maisha yao kwa kufata umbali mrefu hususa wanawake.

"Nimpongeze Mhe.Rais Dkt.Samia Suluhu Hassan kwa kuimarisha mashirikiano na Sekta Binafsi nchini,kupitia mashirikiano haya leo hii tunashudia Uzinduzi wa mradi wa maji utakaowanufaisha wananchi zaidi ya 14,000.Nitumie pia fursa hii kuwashukuru Kampuni ya Serengeti Breweries kwa ufadhili huu mkitambua juhudi za Serikali ya awamu ya sita ya kumtua mama ndoo kichwani."alisema Mhe.Dkt.Ashatu.

Mhe.Dkt Ashatu ameongeza akiwataka wananchi kuutunza mradi huo kuanzia kwenye chanzo cha maji ili usaidie vizazi vijavyo.

Kwa upande wake Mkurugenzi Mtendaji Kampuni ya Serengeti Breweries Nchini Dkt. Obinna Anyalebechi . amesema kampuni hiyo hadi sasa imeshatoa ufadhili wa miradi ya maji nchini ukiwafikia zaidi ya watu Mil 2 ikitoa fedha kama sehemu ya kuisaidia jamii (CSR)akipongeza ushirikiano mkubwa uliotolewa na wananchi kwa watekelezaji wa mradi huo hadi kukamilika na kuanza kutumika,akiamini kuwa upatikanaji wa maji ni mchango mkubwa katika maendeleo endelevu Duniani akiwaasa wananchi hao kuutunza.

Nao baadhi ya Wananchi waliozungumza katika mahojiano maalum,wameshukuru kukamilika kwa mradi huo wakiahidi kuutunza ipasavyo.

Mradi huu una jumla ya vituo 11, matanki yenye ujazo wa lita 120,000 pamoja na Kisima ukichochea upatikanaji wa maji Wilaya ya Kondoa sawa na 70% kati ya lengo la 85%.