MKURUGENZI MILLAO AHIMIZA UTUNZAJI WA MAZINGIRA KONDOA DC

Posted on: January 27th, 2026

Mkurugenzi wa Halmashauri ya Wilaya ya Kondoa Ndg. Shaban Millao ametoa wito kwa watumishi wote wa wilaya na wananchi kwa ujumla kuzingatia utunzaji wa mazingira katika maeneo yao.

Mkurugenzi Millao ameyasema hayo leo Januari 27, 2026 alipokuwa akijumuika na watumishi katika zoezi la kupanda miti kwenye maeneo mbalimbali ya Wilaya hiyo.

Ndg. Millao amesema kuwa katika wilaya ya kondoa hadi kufikia leo januari 27 miti ya aina mbalimbali zaidi ya 2000 imesambazwa na kupandwa katika maeneo ya shule za msingi na Sekondari, vituo vya afya na maeneo mengine ya kimkakati.

Aidha Ndg.Millao ameainisha umuhimu wa kutunza mazingira kwa ustawi chanya wa maendeleo endelevu ya kijamii na kiuchumi kwa vizazi vya sasa na vijavyo.

Sanjari na hayo, Mkurugenzi Millao amemtakia Kheri ya kumbukizi ya kuzaliwa kwake Mhe.Rais wa Jamhuri ya Muungano wa Tanzania Dkt.Samia Suluhu Hassan.

"Natumia fursa hii kumpa zawadi Mhe.Rais wetu Dkt.Samia Suluhu Hassan Zawadi ya kupanda miti na kutunza mazingira yetu"

"Tunaungana na Mtunza mazingira kinara nchini Mhe. Rais Dkt. Samia Suluhu katika kutimiza azma na maono yake ya kuifanya Tanzania ya Kijani"  aliongeza Ndg Millao

Aidha Ndg. Millao ametoa wito kwa viongozi wa serikali za vijiji na kata Wilayani hapo kuhakikisha zinafuatilia taarifa za wakazi na kuwaandikisha katika Daftari maalum la wakazi lilipo katika ofisi za serikali za mitaa.

Pamoja na mambo mengine, Ndg. Millao ametoa wito kwa viongozi wa serikali za mitaa kuhamasisha wananchi kujiunga na mfuko wa Bima ya Afya kwa wote ili kudumisha mustakbali wa afya bora  kwa jamii.

Zoezi hili adhimu limepambwa na kauli mbiu " Uzalendo ni kutunza Mazingira, Shiriki Kupanda Miti"