INADES-FORMATION & KONDOA DC KUFIKIA MALENGO UPANDAJI MITI

Posted on: January 30th, 2026

Shirika la Inades-Formation Tanzania kwa kushirikiana na Halmashauri ya Wilaya ya Kondoa limezindua Kampeni ya Panda mti tuilinde kesho katika kijiji cha Salare katika Kata ya Pahi.

Akizungumza kwa niaba ya Mkurugenzi Mtendaji wa Shirika hilo,Mkuu wa idara ya mafunzo Bw. Michael Angelo amesema kuwa lengo la mradi huo ni kuongeza hali ya ustahimilivu wa jamii vijijini kukabiliana na mabadiliko ya tabia ya nchi.

"Katika kuunga juhudi za serikali kutunza mazingira, Inades-Formation limewezesha kupanda miti 1057 hapa salare ikiwemo ile 57 ya matunda, pia zoezi hili limeendelea kwa katika vijiji vya mauno na potea ambapo jumla ya miti 2000 inaendelea kupandwa"

"Shirika lina mkakati wa kupanda miti zaidi ya 10,000 kwa kipindi cha januari hadi april mwaka huu" aliongeza Bw. Michael

Bw.michael alihitimisha kwa kutoa salamu za Mkurugenzi Mtendaji wa Shirika hilo Bi. Jacqueline Nicodemus kwa wageni waalikwa, Mkurugenzi wa wilaya na wanakijiji wote waliohudhuria ufunguzi wa tukio hilo.

Kwa upande wake,Mgeni rasmi katika kampeni hizo, Mkurugenzi Mtendaji wa Wilaya ya Kondoa Ndg. Shaban Millao amelipongeza Shirika la Inades-Formation Tanzania kwa hatua hiyo ya upandaji miti na kutunza mazingira.

Aidha,Ndg Millao ametoa rai kwa wananchi wa vijiji vyote kudumisha utaratibu wa kutunza miti na kuingalia ili suala hilo liwe na tija ambapo amesisitiza kila kaya kupanda miti isiyopungua kumi na kuitunza.

Sanjari na hayo Ndg.Millao amewaagiza viongozi wa vijiji na kata kusimamia suala la mahudhurio ya watoto wenye umri wa kuanza shule, kutoficha watoto wenye ulemavu ndani lakini pia waalimu na wazazi kuzingatia suala la lishe shuleni kwa kuhakikisha wazazi wanachangia chakula. shuleni.

"Mtoto anapokula anapata muda wa kupumzika na kusoma kwa makini sana, hili litaongeza mahudhurio ya watoto wetu shuleni"

" Pia natoa wito kwa wanakijiji na wananchi wote kufuatilia na kujiunga na mfuko wa Bima ya Afya kwa wote uliozinduliwa tarehe 26 januari mwaka huu, hili ni muhimu kwa Ustawi wa jamii yetu" aliongeza Ndg. Millao

Pamoja na mambo mengine, Mkurugenzi millao amewaasa viongozi wa kata na vijiji kulifanyia kazi daftari la Wakazi ili kuweka sawa taarifa za makazi kwa maslahi ya Taifa.

Shirika la Inades-Formation linafanya shughuli zake mbalimbali katika vijiji vitano vya wilaya ya kondoa ambavyo ni Salare,potea.keikei,sambwa na mauno ambapo mradi huu ulianza juni 2025 na unatarajia kukamilika Julai 2028