WAZIRI DKT. ASHATU AHIMIZA WELEDI NA UWAWAJIBIKAJI KATIKA UTEKELEZAJI WA MAJUKUMU KONDOA DC

Posted on: January 24th, 2026

Waziri wa Maliasili na Utalii, Mhe. Dkt. Ashatu Kijaji (Mb), amewahimiza watumishi wa Halmashauri ya Wilaya ya Kondoa kuzingatia weledi, maadili ya kazi na uwajibikaji katika utekelezaji wa majukumu yao ya kila siku kwa lengo la kuwahudumia wananchi kwa ufanisi.

Dkt. Ashatu ameyasema hayo katika tafrija ya kuukaribisha mwaka 2026, iliyoandaliwa na Ofisi ya Mkurugenzi Mtendaji wa Halmashauri ya Wilaya ya Kondoa, ambapo alikuwa mgeni rasmi.

Katika hotuba yake, Dkt. Ashatu, amewasisitiza watumishi kujenga utamaduni wa kuweka vipaumbele katika utoaji wa huduma bora, sambamba na kuendana na kasi na maono ya Rais wa Jamhuri ya Muungano wa Tanzania, Mhe. Dkt. Samia Suluhu Hassan, ya kuijenga Tanzania yenye maendeleo jumuishi katika sekta zote.

Aidha, Dkt. Ashatu amehimiza umuhimu wa upandaji miti na utunzaji wa mazingira kwa watumishi na wananchi kwa ujumla, ili kuendana na falsafa ya Tanzania ya Kijani.

Awali, akitoa salamu za Halmashauri, Mkurugenzi Mtendaji wa Wilaya ya Kondoa, Ndg. Shaban Millao, amemshukuru Mhe. Dkt. Ashatu kwa kuhudhuria tafrija hiyo na kumpongeza kwa kuendelea kuaminiwa na Rais wa Jamhuri ya Muungano wa Tanzania.

“Tunamshukuru sana Mhe. Rais wetu Dkt. Samia Suluhu Hassan kwa kutupa Waziri kinara anayejitoa kwa dhati katika kuwatumikia wananchi. Sisi kama Halmashauri tuko pamoja naye na tunaendelea kutekeleza majukumu yetu kwa uadilifu na utu,” amesema Ndg. Millao.

Aidha, Ndg. Millao amemwomba Waziri Dkt. Ashatu Kijaji kumfikishia salamu za shukrani Mhe. Rais, kwa kuendelea kumuamini pia kwa Halmashauri kunufaika kwa kupokea watumishi wapya 222 wa kada mbalimbali, hatua itakayoongeza ufanisi katika utoaji wa huduma kwa wananchi.

Kwa upande wake, Mwenyekiti wa Halmashauri ya Wilaya ya Kondoa, Mhe. Salum Mabote, amesisitiza umuhimu wa umoja, mshikamano na ushirikiano miongoni mwa watumishi na viongozi wa wilaya katika kuwaletea wananchi maendeleo endelevu.

Naye Katibu Tawala wa Wilaya ya Kondoa, Bi. Christina Kalekezi, akimwakilisha Mkuu wa Wilaya ya Kondoa, amewataka watumishi kuzingatia maadili ya kazi na misingi ya utumishi wa umma kuanzia ngazi ya chini hadi ya juu, ili kujenga utumishi uliotukuka, wenye tija na unaolenga maslahi mapana ya Taifa.

Tafrija hiyo ilitanguliwa na Bonanza lililofana kwa kufanyika kwa michezo mbalimbali ambayo ilitoa fursa kwa Watumishi wote wa Halmashauri kushirikiana vyema, kuongeza upendo pamoja ukaribu zaidi