KAMATI YA LISHE KONDOA DC YAPITIA TAARIFA YA UTEKELEZAJI WA MKATABA WA LISHE

Posted on: January 26th, 2026

Kamati ya Lishe ya Halmashauri ya Wilaya ya Kondoa Imefanya kikao cha kupitia taarifa ya utekelezaji wa mkataba wa lishe katika kipindi cha mwezi Oktoba hadi Disemba 2025.

Akiongoza kikao hicho, mwenyekiti wa kamati hiyo ambae pia ni Mkurugenzi Mtendaji wa Halmashauri ya Wilaya ya kondoa Ndg. Shaban Millao amewaongoza wajumbe wa kamati hiyo katika mapitio, uhakiki, maboresho, mashauriano na kutoa maagizo yanayogusa mustakbali chanya wa lishe bora katika shule zote za msingi na sekondari katika  Wilaya hiyo.

Akiwasilisha taarifa ya utekelezaji wa mkataba huo, Afisa lishe wa Wilaya ya Kondoa Ndg. Khamis Faki amebainisha kuwa asilimia 85.3 ( Milioni 26) ya fedha zilizotolewa kwa ajili ya kutekeleza mkataba huo kati ya mwezi Oktoba hadi Disemba 2025 zimetumika vilivyo ambapo wanawake wajawazito 18,406 walipata huduma ya vidonge vya madini ya chuma na asidi ya foliki (FEFO) ikiwa ni utekelezaji wa asilimia 100.

Nao watoto saba waliibuliwa na kupatiwa matibabu ya utapiamlo mkali sawa na asilimia 100, lakini pia Kwa kipindi cha Oktoba – Disemba, 2025 jumla ya akina mama/walezi  3,657 kati ya 39,318 walio na watoto  wenye umri wa  miezi 0-23  walipewa unasihi  juu ya ulishaji na watoa huduma za afya ngazi ya jamii, sawa na asilimia 100, pia  jumla ya akina mama/walezi  39,318 kati ya 39,318 walio na watoto  wa  miezi 0-23  walipewa unasihi  juu ya ulishaji wa watoto sawa na asilimia 100.

Zaidi ya hayo,Halmashauri imefanikiwa kufanya kikao kimoja cha kamati ya lishe, pia halmashauri ilifanya kaguzi za usalama na ubora wa vyakula ili kuweza kubaini ubora na usalama wa vyakula kwa ajili ya matumizi ya binadamu.

Kwa kipindi cha robo ya pili, kati ya shule 130 (Msingi na Sekondari) zilizopo ni shule 101 pekee zilizobainika kutoa chakula kwa wanafunzi ambapo ni sawa na asilimia 77.69 ambapo hii ni jumla ya  wanafunzi 23,870

Lakini pia Vijiji vyote 84 viliadhimisha siku ya afya na lishe sawa na asilimia 100 ya mwitikio halisi.

Kamati hiyo imeazimia kuendelea na Juhudi za kutoa elimu kwa wananchi juu ya umuhimu wa lishe kwa watoto, uchangiaji wa chakula husika, uhamasishaji wa walimu wa lishe kusaga chakula kwenye mashine 8 zenye vinyunyizi wilayani hapa, na uundaji wa kamati hai za lishe za vijiji na kata kwa ujumla.

Pamoja na mambo mengine, mwenyekiti wa kamati hiyo mkurugenzi Shaban Millao ametoa maagizo kwa wajumbe wa kamati hiyo kuhakiki ubora wa takwimu za lishe zinazowasilishwa na kuzifanyia kazi, kualika wadau wenye uwezo kuchangia katika programu za lishe shuleni na kuhakikisha wazazi wanachangia kwa kiwango kinachotakiwa katika programu ya lishe shuleni.