WATUMISHI KONDOA DC WAMPONGEZA MHE.RAIS SAMIA

Posted on: May 4th, 2025

Watumishi wa Halmashauri ya Wilaya ya Kondoa wakiongozwa na Mkuu wa Divisheni ya Utawala na rasilimali watu wamempongeza Mhe.Rais Dkt Samia Suluhu Hassan kwa kuongeza kima cha chini cha mshahara kwa 35.1%.

Hayo yamejiri mapema Mei Mosi ikiwa ni baada ya tamko la Mhe.Rais Dkt.Samia Suluhu Hassan akihutubia makundi mbalimbali ya Watumishi wa Umma na Sekta binafsi katika sherehe za maadhimisho ya siku ya wafanyakazi Duniani yaliyofanyika Kitaifa katika  Viwanja vya Bombadia Manispaa ya Singida.

"Tunampongeza Mhe.Rais Dkt.Samia Suluhu Hassan kwa kuendelea kuboresha maslahi ya watumishi, kwa kuwapandisha madaraja na sasa kuwaongeza kima cha chini cha mshahara kwa watumishi wa umma kwa 35.1% kutoka Tzs.370,000 hadi Tzs.500,000.kupitia nyongeza hii itachochea hari ya kufanya kazi kwa watumishi" alisema Ndg.Peter Ngomuo, Mkuu wa Divisheni ya Utawala na raslimali Watu Halmashauri ya Wilaya ya Kondoa.

Ndg.Ngomuo ametumia nafasi hiyo pia kumpongeza Mkurugenzi Mtendaji wa Halmashauri ya Wilaya ya Kondoa, Ndg.Shaban Millao kwa niaba ya watumishi, kwa kuwezesha ushiriki wa baadhi ya watumishi waliofanikiwa kupendekezwa na watumishi wenzao kama watumishi hodari kwa Mwaka 2024/2925  kwa kuzingatia kada husika. Sherehe za Maadhimisho hayo kwa mwaka huu zilifanyika Mkoani Singida ambapo Kaulimbiu ilikuwa "Uchaguzi Mkuu 2025 utuletee Viongozi wanaojali hali na maslahi ya wafanyakazi, sote tushiriki.

Nyongeza hiyo ya mshahara inatarajiwa kuanza kutumika katika mwaka wa fedha 2025/2026, kuanzia mwezi Julai kiwango cha chini cha mshahara kuongezeka kutoka TzS. 370,000 hadi 500,000 sambamba na ngazi nyingine za mshahara nazo zitapanda kwa kiwango kizuri jinsi bajeti itakavyoruhusu.