DC NYANGASA AONGOZA KIKAO CHA KAMATI YA USHAURI YA WILAYA - BAJETI (DCC) MWAKA WA FEDHA 2025/2026

Posted on: February 15th, 2026

Mkuu wa Wilaya ya Kondoa, Mhe. Fatma Nyangasa, ameongoza Kikao cha Kamati ya Ushauri ya Wilaya - Bajeti (DCC) ambacho kimehusisha Halmashauri zote mbili za Wilaya katika Ukumbi wa Mikutano wa Halmashauri leo Februari 15, 2026.

DC Nyangasa ameongoza Agenda za Kikao hicho ambacho kimehudhuriwa na Katibu Tawala Wilaya ya Kondoa, Wakurugenzi Watendaji, Wenyeviti wa Halmashauri, Watendaji wa Kata, Wakuu wa Idara na Vitengo, Wakuu wa Taasisi, Wafanyabiashara pamoja na Wadau mbalimbali wa Maendeleo.

Agenda kuu za Kikao hicho ilikuwa ni kupokea na kujadili Rasimu ya Randama ya  Mipango na Bajeti ya Halmashauri kwa Mwaka wa Fedha 2025/2026, ambazo zimewasilishwa na Maafisa Mipango wa Halmashauri zote mbili na kutolewa ufafanuzi na Wakurugenzi Watendaji.

Aidha, katika Kikao hicho, Mhe. Fatma Nyangasa, amezipongeza Halmashauri zote kwa kuwasilisha vyema Mipango na Bajeti kwa Mwaka wa Fedha 2025/2026 na kuwataka Wakurugenzi Watendaji kusimamia vyema utekelezaji wa Mipango hiyo ili kuleta maendeleo yenye tija ndani ya Wilaya ya Kondoa.

"Ni muhimu kabla ya kuanza utekelezaji wa Mipango hii, kwanza mtoe Elimu ya kutosha kwa Wananchi na Wadau mbalimbali ili waweze kutambua nini wanatakiwa kufanya kwa lengo la kusaidia utekelezaji mzuri Mipango yetu ya kuleta maendeleo" amesema Mhe. Nyangasa.

Akihitimisha Kikao hicho, DC Nyangasa amesisitiza Halmashauri zote mbili kujikita zaidi katika kuongeza vyanzo vya ukusanyaji wa mapato pamoja na kuvisimamia vizuri vile vyanzo vikubwa, vilevile kujiandaa na maandalizi ya Mipango na Bajeti kwa Mwaka wa Fedha 2026/2027.