DKT.ASHATU AIFUNGUA ZAHANATI YA BERABERA,KONDOA DC

Posted on: February 1st, 2026

Mbunge wa Kondoa na Waziri wa maliasili na Utalii Mhe.Dkt.Ashatu Kijaji ameifungua Zahanati ya BeraBera iliyopo kata ya Kikilo katika Wilaya ya Kondoa.

Akiongoza ujumbe alio ambatana nao, Dkt. Ashatu amekagua majengo na miundombinu ya Zahanati hiyo pamoja na vifaa tiba vilivyopo na kuruhusu baadhi ya huduma kuanza kutolewa zahanati hapo.

Akitoa hotuba yake wakati wa tukio ufunguzi wa Zahanati hiyo,Dkt. Kijaji amewaasa wananchi kuitumia vyema zahanati hiyo na kutunza miundombinu yake.

Aidha Dkt.Kijaji ameambatana na Mkurugenzi Mtendaji wa Halmashauri ya Wilaya ya kondoa,Mwenyekiti wake na Mhe.Diwani wa Kata ya Kikilo katika zoezi la upandaji miti katika eneo la Zahanati hiyo na kuwaasa wanakijiji kujenga tabia ya kutunza mazingira kwa kufanya hivyo.

Naye Mwenyekiti wa Halmashauri ya wilaya ya Kondoa Mhe.Salum Mabote amempongeza Mhe.Dkt. Ashatu kwa kuendelea kufanya kwa juhudi na kuendelea kuwahudumia wananchi.

"Mhe.mbunge wetu Dkt.Kijaji anafanya kazi usiku na mchana kuhakikisha kuwa kondoa yetu inakuwa ni yenye maendeleo na kila mtu anafikiwa na huduma muhimu za kijamii kama hii inayozinduliwa hii leo na kwa namna hii anatekeleza falsafa ya Kazi na Utu kweli kweli" aliongeza Mhe.Mabote

Akiwasilisha salamu zake, Mkurugenzi Mtendaji wa Wilaya ya Kondoa Ndg.Shaban Millao amemshukuru Dkt. Ashatu kwa kuhudhuria uzinduzi huo na kumuahidi utekelezaji uliotukuka wa miradi mbalimbali ya maendeleo wilayani hapo.

" Ninakushukuru Mhe. Mbunge wetu kwa kuchangia Milioni moja katika umaliziaji wa miundombinu hapa berabera na ninakuahidi kumalizia sehemu ndogo ya kile kikubwa tulichokianza katika zahanati hii na nitahakikisha kwamba tunarudisha tabasamu kwa wananchi wetu" aliongeza Ndg.Millao

 Ujenzi wa zahanati ya Berabera ulianza mwaka 2021 na kuanza matumizi yake mwaka 2026 ambapo zaidi ya Shilingi Milioni 60 zimetumika ikiwa ni fedha kutoka Serikali kuu, Ofisi ya Mkurugenzi Mtendaji wa Wilaya ya Kondoa,Mhe. Mbunge Dkt.Kijaji na nguvu ya wananchi.

Zahanati hiyo imekwisha anza na  inaendelea na utoaji wa huduma kama vile maabara,Dawa,uzazi wa mpango,magonjwa ya nje,mkoba tembezi, kliniki za baba mama na mtoto nakadhalika