BARAZA LA MADIWANI KONDOA DC LAJADILI AGENDA 8, MIRADI NA USTAWI WA WANANCHI

Posted on: February 3rd, 2026

Kikao cha Baraza la Madiwani wa Halmashauri ya Wilaya ya Kondoa kwa robo ya pili ya Mwaka wa fedha 2025/2026 kimefanyika katika ukumbi wa mikutano wa Wilaya hiyo, kikilenga kujadili masuala mbalimbali ya maendeleo na ustawi wa wananchi.

Kikao hicho kimehudhuriwa na Waheshimiwa Madiwani, Wawakilishi wa Vyama vya Siasa , Mwakilishi kutoka Ofisi ya Mkuu wa Mkoa wa Dodoma pamoja na Wajumbe wa Kamati ya Ulinzi na Usalama ya Wilaya.

Akiongoza kikao hicho, Mwenyekiti wa Halmashauri ya Wilaya ya Kondoa, Mhe. Salum Mabote, amesimamia utekelezaji wa agenda zote nane (8) za kikao na kuongoza mijadala yenye tija kwa maendeleo ya Wilaya.

Katika kikao hicho, Mhe. Mabote pia amepokea na kujadili taarifa za utendaji kazi wa Kamati nne (4) za kudumu za Halmashauri, ambapo taarifa hizo zimefungua mijadala chanya iliyolenga kuboresha utoaji wa huduma kwa wananchi.

Kwa upande wake, Mkurugenzi Mtendaji wa Halmashauri ya Wilaya ya Kondoa, Ndg. Shaban Millao, alipata fursa ya kujibu maswali ya papo kwa papo yaliyoulizwa na Waheshimiwa Madiwani. Miongoni mwa masuala yaliyojadiliwa ni mgogoro wa kijiji cha Kimotoro, utolewaji wa mikopo ya asilimia 10 kwa makundi yenye sifa, fidia kwa Wananchi waliovamiwa na tembo na kuharibiwa mazao, pamoja na mikakati ya Wilaya katika kukabiliana na mabadiliko ya tabianchi.

Aidha, Ndg. Millao alisisitiza umuhimu wa Wananchi kujiunga na Bima ya Afya kwa Wote, Matumizi ya Daftari la Wakazi, Upatikanaji wa lishe mashuleni pamoja na uandikishaji wa Watoto wenye umri wa kwenda shule. Vilevile aliwaasa Waheshimiwa Madiwani kuwa chachu ya utekelezaji wa agenda hizo katika maeneo yao.

Katika kikao hicho, Mwakilishi kutoka Ofisi ya Mkuu wa Mkoa wa Dodoma, Ndg. Erick..., aliwasilisha salamu kwa niaba ya Mkuu wa Mkoa, Mhe. Rosemary Senyamule, na kupongeza uongozi wa Halmashauri ya Wilaya ya Kondoa kwa utendaji kazi mzuri na utekelezaji wa Ilani ya Chama Tawala.

“Mhe. Mkuu wa Mkoa amenituma kuwafahamisha kuwa anaendelea kufuatilia kwa karibu utekelezaji wa miradi yote ya maendeleo na amesisitiza ikamilike kwa wakati ili ianze kuwanufaisha wananchi,” - Ndg. Erick.

Akihairisha Baraza hilo, Mwenyekiti Mabote amepongeza juhudi zilizofanyika katika Sekta ya Elimu kwa ufaulu kuongezeka kwa asilimia 95.89% katika matokeo ya Kidato cha Nne Mwaka 2025 kutoka 93.41% Mwaka 2024. Aidha amewataka Waheshimiwa Madiwani kusimamia vyema na kuyatekeleza yale yote yaliyojadiliwa katika Baraza hilo ili kuendelea kuleta tabasamu kwa Wananchi.