WARAGHIBISHI MASUALA YA KIJINSIA WILAYA YA KONDOA WAJENGEWA UWEZO

Posted on: June 21st, 2025

Timu ya Waraghibishi Halmashauri ya Wilaya na Mji Kondoa wamepata Mafunzo dhidi ya Masuala ya Kijinsia na Uwezeshaji Wanawake Kiuchumiu pamoja na mbinu za kupambana na Ukatili wa kijinsia.

Haya yamejiri ikiwa ni baada ya kufanyika kwa zoezi la Uraghabishi kwenye Kata ya Keikei (Kondoa DC)na Suruke (Kondoa TC) kupitia ushirikiano wa Mtandao wa Kijinsia Nchini (TGNP) na "The Aghakan Foundation" chini ya Ufadhili wa Ubalozi wa Ireland Nchini katika Mradi wa Tuinuke Pamoja kwa kuanzisha Vituo vya Taarifa na Maarifa.

Akizungumza katika mahojiano maalum , Mwezeshaji wa Jamii katika Masuala ya Kijinsia Ndg.Deogratius Temba amesema lengo la mafunzo hayo ni kuwaongezea uelewa Waraghibishi hao katika kuongeza ufanisi na utendaji kwenye Vituo vya Taarifa na Maarifa ili kupata matokeo makubwa zaidi wakishirikiana na Viongozi wa Serikali kwenye maeneo yao.

"Uanzishwaji wa vituo hivi umesaidia utoaji wa elimu kwa jamii kwa kuzingatia makundi mbalimbali wakihamasisha usawa wa kijinsia kupitia mikutano ya kijiji, makongamano na midahalo." alisema Ndg. Temba.

Ndg.Temba amegusia mada muhimu watakazofundishwa  zikiwemo umuhimu wa ujenzi wa nguvu ya pamoja, shughuli za uhamasishaji maendeleo ya jamii , akielezea tumaini lao katika kuleta mabadiliko makubwa kwa kuongeza ufanisi wa utendaji kwenye vituo vya maarifa na taarifa ili kuongeza nguvu kubwa ya kufanya kazi.

Naye Bi.Fredina Saidi ambaye ni Mwezeshaji wa Mafunzo hayo amesema Uraghibishi ni kama taa inayoona vitu kwenye jamii ikitafuta majawabu ya utatuzi wa changamoto kwa majadiliano ikiwa ni njia pekee ya kuleta fursa katika utatuzi wa changamoto zilizopo katika jamii kwa kuzingatia Uibuaji, Uchambuzi na Ufuatiliaji.

Mafunzo haya ni siku nne kwa  Waraghibishi hao yanafanyika katika Viwanja vya Riverside Kondoa Mjini.