WANANCHI KIJIJI CHA ITUNDWI WAADHIMISHA KWA VITENDO SIKU YA AFYA NA LISHE

Posted on: May 7th, 2025

Wananchi wa Kijiji cha Itundwi kata ya Mnenia Halmashauri ya Wilaya ya Kondoa wameadhimisha Siku ya Afya na Lishe kwa vitendo.

Maadhimisho hayo yamekwenda sambamba na ushiriki wa pamoja na wataalam wa lishe kutoka Halmashauri pamoja na Shirika lisilo la kiserikali Inades Formation Tanzania kwa wananchi hao kupatiwa Elimu ya Lishe pamoja na Upimaji wa Afya.

Akizungumza katika mahojiano maalum Afisa Lishe Halmashauri Ndg. Khamis Faki amesema maadhimisho hayo hufanyika mara moja kila baada ya miezi mitatu, akipongeza ushiriki wa Shirika la Inades Formation katika maadhimisho hayo pamoja na juhudi za halmashauri katika kutekeleza azma ya Mhe. Rais Dkt. Samia Suluhu Hassan katika kupambana dhidi ya matatizo ya lishe yakiwemo Udumavu na Utapiamlo mkali.

"Wananchi wamepata elimu ya lishe, magonjwa yasiyoambukizwa, makundi ya vyakula na mapishi mchanganyiko, pamoja upimaji wa Afya zao bure  dhidi ya hali zao za lishe, Presha, Kisukari, UKIMWI pamoja na Malaria. Zoezi hili ni endelevu katika vijiji vingine "ameongeza Ndg. Faki.

Naye Afisa Lishe kutoka Shirika lisilo la Kiserikali Inades Formation Tanzania Ndg. Deis Molla amesema kijiji cha Itundwi ni miongoni mwa vijiji nufaika vya mradi unaotekelezwa na Shirika hilo, wakiadhimisha pamoja na wananchi wa kijiji hicho kwa kuwapa elimu ya lishe kuhusiana na makundi mbalimbali ya vyakula kulingana na mwongozo wa lishe unaotumika Tanzania Bara, ufanyikaji wa maonyesho ya makundi mbalimbali ya vyakula kwa kuzingatia namna sahihi ya kuviandaa na kuyala kulingana na umri, uzito na hali na hali ya mtu husika sambamba na upikaji wa vyakula vya asili kwa kuzingatia makundi mbalimbali ya vyakula.

Bi. Molla ameongeza kwa kuwahimiza wananchi kuzingatia mlo kamili kwa kuzingatia makundi ya chakula pamoja na uzingatiaji wa usafi na usalama katika maandalizi ya chakula.

Kwa upande wao baadhi ya Wananchi walioshiriki katika maadhimisho hayo wamepongeza utoaji wa elimu hiyo ya lishe, wakiomba kuwa liwe ni zoezi endelevu pamoja na kuahidi uzingatiaji wa ulaji wa chakula bora kwa kuzingatia makundi mbalimbali ya vyakula.