WAANDIKISHAJI WASAIDIZI NA WAENDESHA VIFAA VYA BIOMETRIKI KONDOA DC WALA KIAPO ZOEZI LA UBORESHAJI DAFTARI

Posted on: December 10th, 2024

Waandikishaji Wasaidizi na Waendesha Vifaa vya Biometriki wamekula kiapo mbele ya Hakimu Mkazi Wilaya ya Kondoa Mhe.Selemani Shungu Selemani tayari kwa mafunzo ya siku mbili pamoja na kuanza rasmi utekelezaji wa kazi ya uboreshaji wa Daftari la Wapiga kura.

Kiapo hicho kimefanyika katika Ukumbi wa Mikutano Chuo cha Ualimu Bustani Kondoa Mjini ambapo Waandikishaji Wasaidizi, Waendesha Vifaa vya Biometriki, Maafisa Waandikishaji Wasaidizi ngazi ya kata 21,Maafisa wa Tume Huru ya Uchaguzi na Timu ya Uboreshaji Halmashauri wamehudhuriwa wakiongozwa na Afisa Mwandikishaji Halmashauri Ndg.Peter Ngomuo.

Akizungumza na wapokea mafunzo hayo Mjumbe wa Tume Huru ya Uchaguzi Mhe.Jaji Asina Omary ambaye ni Mgeni Rasmi katika mafunzo hayo amesema"Nyinyi ni Sura ya zoezi letu,mkakumbuke matumizi mazuri ya lugha,mfahamu majukumu yenu na viapo vyenu vikawe chachu."

Kwa upande wake Mkurugenzi Mtendaji wa Halmashauri ya Wilaya ya Kondoa Ndg.Shaban Millao amesema "ni zoezi muhimu sana kwa mustakabali wa nchi yetu,wekeni umakini katika mafunzo haya na wakati wa zoezi litakapoanza hakikisheni mnazingatia muda".

Uboreshaji wa Daftari la kudumu la Wapiga kura unatarajiwa kufanyika kuanzia tarehe 11hadi 17 Desemba 2024 katika vituo 313 vya halmashauri,ambapo wapiga kura wapya wataandikishwa na wengine kuboresha taarifa zao pamoja na kuwaondoa wote wasio na sifa za kuwa wapiga kura.

Pia zoezi hili linaongozwa na kauli mbiu isemayo "Kujiandikisha kuwa Mpiga kura ni Msingi wa Uchaguzi Bora ".