VIONGOZI, WATUMISHI NA WANANCHI WASHIRIKI USAFI WA MAZINGIRA WA MWEZI HOSPITALI YA HALMASHAURI YA HALMASHAURI KONDOA -BUKULU

Posted on: May 26th, 2024

Viongozi, Watumishi na Wananchi wa Halmashauri ya Wilaya ya Kondoa wakiongozwa na Mkuu wa Wilaya Kondoa Dk. Hamis Mkanachi, wameshiriki usafi wa pamoja katika mazingira ya Hospitali ya Halmashauri ya Wilaya ya Kondoa iliyopo Bukulu.

Akizungumza na hadhira hiyo Dk.Mkanachi  amewapongeza kwa kuitumia siku ya usafi wa mwisho wa mwezi kujumuika pamoja kusafisha mazingira ya hospitali, lengo likiwa ni kuongeza usalama wa mazingira yanayozunguka hospitali hiyo.

Naye Bi.Christina Kalekezi  ambaye ni Katibu Tawala amewapongeza watumishi hao na Jamii kwa kuitaka hadhira hiyo kuwa mabalozi kwa wengine kusafisha mazingira yao ya kazi pamoja na makazi, akiwataka kujitokeza tena kushiri usafi wa pamoja jumamosi ya Tarehe 1/06/2024 kama sehemu ya kuadhimisha miaka 60 ya Mbio za Mwenge wa Uhuru nchini ambao kwa sasa unaendelea kuzunguka katika halmashauri zote nchini na kwa halmashauri ya Wilaya ya Kondoa unatarajiwa kupokelewa tarehe 1/07/2024.

Naye Diwani wa kata ya Soera Mh.Jamilah Gamaha amepongeza mashirikiano ya pamoja baina ya watumishi wa afya na wananchi, akipendekeza liwe zoezi endelevu kwa kutenga siku maalum katika wiki kuendelea kuboresha mandhari ya hospitali hiyo ili kuongeza usalama na mvuto kwa shughuli za kitabibu kwa watumiaji wa hospitali hiyo.

Akihitimisha kwa niaba ya Mkurugenzi Mtendaji, Afisa Mipango na Uratibu Ndg.Joshua Mnyang'ali ameshukuru na kupongeza kwa watumishi na wananchi waliojitokeza kusafisha mazingira hayo,akiwaasa kuwahamasisha wengine kujitokeza kwa wingi kushiriki pamoja zoezi la usafi siku ya tarehe 1/06/2024 katika hospitali hiyo.