UPASUAJI WA KIBINGWA WA KUUNGANISHA UTUMBO MDOGO WAFANYIKA HOSPITALI YA HALMASHAURI YA WILAYA YA KONDOA.

Posted on: October 1st, 2024

Hospitali ya Halmashauri ya Wilaya ya Kondoa iliyopo Bukulu kwa mara ya kwanza imefanya Operesheni ya kwanza ya Kibingwa ya kukata kipande cha utumbo mdogo na kuunganisha utumbo huo baada ya kujikunja.

Hayo yamefanywa na Madaktari Bingwa wa Rais Mhe.Dkt Samia Suluhu Hassan kwa kushirikiana na timu ya wataalam wa afya kutoka halmashauri ikiwa ni awamu ya pili ya  utoaji huduma za kibingwa  na ubingwa bobezi kwa halmashauri za Mkoa wa Dodoma kupitia hospitali zake.

Operesheni hiyo imefanywa na Dr.Lukiza Kamhabwa (Bingwa wa upasuaji/bobezi wa mfumo wa mkojo) kwa mgonjwa aliyepewa jina la I.D.N mwenye miaka 42 mkazi wa kijiji cha Sakami Akimfanyia upasuaji wa kukata kipande cha utumbo mdogo na kuunganisha baada ya utumbo huo kujikunja kutokana na uvimbe katika utumbo mdogo.

Sambamba na Operesheni hiyo ya kibingwa pia Mwanamke aliyepewa jina la M.S.H wa miaka 27 kutoka Sakami alifanyiwa upasuaji wa kutoa uvimbe kwenye via vya uzazi na Dr Emiliana Mvungi

(Bingwa wa magonjwa ya wanawake na ukunga) uliomtesa kwa miaka 10 na Mwanaume mwenye jina H.I.M mwenye umri wa miaka 96 aliyekuwa anasumbuliwa na tatizo la ngiri (Hernia)iliyomsumbua kwa miaka 5 alifanyiwa upasuaji kwa njia ya kisasa (Hernioplasty).

Katika huduma hizo za kibingwa wagonjwa walionufaika na ujio wa madaktari bingwa ni 381kupitia mchanganuo wa Magonjwa ya ndani walikua 119, magonjwa yanayohitaji upasuaji 67, magonjwa ya Watoto 85 na magonjwa ya akinamama 111.

Kwa upande viongozi wa Halmashauri   wakiongozwa na Mkurugenzi Mtendaji Ndg.Shaban Millao na Mwenyekiti wa Kamati ya Afya, Elimu na Maji  Mhe.Rahim  Salum walipata wasaa wa kuzungumza na wananchi waliojitokeza kupata matibabu ya kibingwa na ubingwa bobezi na kuzungumza na jopo la madaktari hao wa kibingwa.

Ndg.Millao alitumia fursa hiyo kumshukuru Mhe.Rais Dkt.Samia Suluhu Hassan

kwa jitihada zake za kuhakikisha wananchi wengi wanafaidika na huduma hizo za kibingwa, jitihada za Mhe.Dkt Ashatu Kijaji (Mb) kwa kuwapambania wananchi wa Jimbo la Kondoa dhidi ya huduma za afya, Watumishi wa Vituoni, Mwenyekiti wa huduma za jamii pamoja na timu ya uendeshaji wa huduma za afya kwa kusimamia zoezi zima.

Pamoja na kuwahudumia wananchi waliojitokeza katika hospitali hiyo kwa upande wa watoa huduma za afya wa Halmashauri walipata mafunzo elekezi kazini (Mentorship)kutoka kwa madaktari bingwa wa Rais Mhe.Dkt.Samia Suluhu Hassan.

Huduma za kibingwa na bobezi kwa awamu ya pili  zimetolewa katika Halmashauri ya wilaya ya Kondoa kuanzia tarehe 24 hadi 28 Septemba, 2024 kwa wananchi (wagonjwa waliojitokeza) wakipatiwa huduma za kibingwa kwa magonjwa ya wanawake na ukunga, watotona watoto wachanga, magonjwa ya ndani na upasuaji katika mfumo wa mkojo kama sehemu ya jitihada za Mhe.Rais Dkt.Samia katika kuhakikisha wananchi wengi wanafaidika na huduma hizo za kibingwa na bobezi.