TIMU WEZESHI YA UNCDF YAPIGA HODI KONDOA DC

Posted on: January 22nd, 2025

Wataalam toka Taasisi ya Umoja wa Mataifa inayoshughulika na upatikanaji na utunzaji wa Mitaji katika nyanja ya mazingira (UNCDF) wamepiga hodi katika Halmashauri ya Wilaya Kondoa na kuendesha Kikao kazi kwa Wakuu wa Divisheni  na Vitengo wa Halmashauri hiyo.

Akiongoza kikao hicho Mwakilishi kutoka Taasisi hiyo Dkt.Aine Mushi amesema mafunzo hayo, yanalenga kuendeleza awamu ya Pili ya Mfumo huu,ambapo halmashauri zote nchini zilizopo katika Mfumo huu,zitalazimika kuandaa miradi ya kimkakati ya kukabiliana na athari za mabadiliko ya tabia nchi ili kupata rasilimali fedha toka kwa wadau wa maendeleo, na fedha hizo kutumwa moja kwa moja kuja Halmashauri kupitia Hazina.

"Mfumo huu ambao kimsingi sio mradi, unalenga kuwajengea uwezo Wataalam wa Halmashauri ambapo wataandaa nyaraka zote muhimu kama vile Mpango Mikakati wa Halmashauri ili kuweza kuandaa maandiko ya miradi ya Maendeleo inayosaidia Jamii kupambana na athari za mabadiliko ya Tabia nchi'   amesema Dkt.Aine Mushi.

Dkt.Aine amesema shughuli hizi zinawezeshwa na nchi marafiki ambao pia ni Wadau wa Maendeleo kama vile Balozi mbali mbali hapa nchini zikiwemo:Norway, Ireland, Ubelgiji na Umoja wa Ulaya-EU.

Kikao kazi hicho kimefanyika Januari 17,2025 kikilenga kuwapa uelewa na kuwajengea uwezo wa awali wa Mfumo Mpya unaopigiwa chapuo na Taasisi hiyo,kuwajengea uwezo Wataalam wa Halmashauri katika kukabiliana na athari za mabadiliko ya Tabia nchi.