STAKABADHI GHALANI MUAROBAINI ENDELEVU KWA WAKULIMA WILAYA YA KONDOA

Posted on: June 25th, 2025

Wafanyabiashara Kondoa wametakiwa kutumia Mfumo wa Stakabadhi ghalani unaotumika katika mauzo ya Mazao ya Ufuta, Dengu na Mbaazi ili kupata Bei Nzuri na endelevu.

Hayo yamebainishwa katika Kikao cha Baraza la Biashara Wilaya ya Kondoa kilichofanyika tarehe 23/06/2025 katika Ukumbi wa Halmashauri ya Mji Kondoa.

Kikao hicho kilichongozwa na Kaimu Mwenyekiti wa Baraza la Biashara Wilaya ya Kondoa Ndg. Ally Mbena, likijadili pamoja na mambo mengine namna bora ya kuuza mazao kupitia Mfumo wa Stakabadhi za Ghala ambapo ilikubaliwa kwa pamoja kuwa elimu na hamasa kuhusu mfumo huu iendelee kutolewa, kutokuuza mazao husika nje ya mfumo na  kuhakikisha ushiriki kamilifu wa wafanya biashara wa mazao ambao ni sehemu muhimu ya kukusanya na kuuza mazao husika katika Vituo vilivyoainishwa kwa  Halmashauri zote mbili, za Kondoa Mji na Halmashauri ya Wilaya ya Kondoa.

Hadi Sasa, Halmashauri ya Wilaya ya Kondoa imeshauza Tani 822.4 za zao la Ufuta Vituo 2 vya Minada vya Kwadelo tani  209 na Kituo cha Chubi kilichopo Kata ya Itaswi zimeuzwa tani 613.4.

Jumla ya Vyama vya Msingi vya Mazao (AMCOs) vipatavyo Vinne vya Nguvumoja AMCOs LTD cha ITASWI, PUBUI AMCOs LTD kinachohudumia Kata za Pahi na Bumbuta, Kwadelo AMCOs LTD( Kata ya Kwadelo) na UMOJA AMCOs LTD kilichopo Kata ya Keikei.

Awamu ya pili ya utoaji wa Elimu na Uhamasishaji utaendelea tena kuanzia mwanzoni mwa Mwezi Julai 2025, ambao utakuwa mahsusi kwa zao la Mbaazi kuendelea kuuzwa kupitia Mfumo wa Stakabadhi za Ghala.

Kata zote za Halmashauri ya Wilaya ya Kondoa zinazalisha kwa wingi zao la Mbaazi, ambapo takribani Tani 15,500 zinatarajiwa kuuzwa Kupitia Mfumo wa Stakabadhi za Ghala kwa Msimu huu wa 2024/2025.