SERA YA TAIFA YA JINSIA NA MAENDELEO YA WANAWAKE YA MWAKA 2023 YAZINDULIWA .

Posted on: March 8th, 2024

Waziri Mkuu wa Jamhuri ya Muungano wa Tanzania Mhe. Kassim Majaliwa amesema Sera ya Jinsia na Maendeleo ya Wanawake ni ya muhimu katika kukuza usawa wa kijinsia hasa kutokana na kuweka kipambele kwa ushiriki wa wanaume katika jitihada za kujenga usawa wa kijinsia.

Hayo yamesemwa kwa niaba yake na Waziiri wa Maendeleo ya Jamii ,Jinsia,Wanawake na Makundi Maalum Mhe.Dkt.Dorothy Gwajima katika maadhimisho ya Siku ya Kimataifa ya  Wanawake Machi 08,2024 yaliyofanyika Wilayani Chamwino Dodoma.

Amebainisha kwamba anaamini sera hiyo itavusha Tanzania katika kipindi kingine kirefu katika utekelezaji wake ili kuendana na Dira ya Taifa ya Maendeleo na Malengo ya Dunia kuhusu usawa wa kijinsia.

‘’Natambua kuwa kazi ya mapitio ya Sera haikuwa rahisi kwani ilihitaji ushiriki wa wadau na rasilimali fedha ,hivyo nawashukuru wadau wote walioshirikiana na Serikali kukamilisha mapitio hayo ikiwemo wananchi waliotoa maoni ,wadau wa maendeleo wa ndani na nje ya nchi ,Asasi za kiraia ,Taasisi Binafsi na Wataalam kutoka Wizara zote na Taasisi za Serikali.vilevile natoa rai kwa wadau kuhakikisha wanatoa ushirikiano katika utekelezaji wa sera hiii’’ Alisema Waziri Dkt.Gwajima.

Ametumia nafasi hiyo pia kuanisha baadhi ya jitihada zinazofanywa na Serikali katika kuwainua wanawake nchini katika Nyanja mbalimbali hasa Elimu ,Maji,Nishati ,Nafasi za Uongozi na Afya ambapo inaonyesha hatua kubwa iliyofanywa na Rais wa Jamhuri ya Muungano wa Tanzania Mhe,Samia Suluhu Hassan kwa kuongeza idadi ya wanawake wanufaika.

Waziri Dkt.Gwajima amewasisitiza wanawake kujiunga vikundi vya maendeleo ili kutumia fursa za kiuchumi zinazotolewa na Serikali pamoja na Wadau kuwahimiza kujitokeza kugombea nafasi mbalimbali za uchaguzi wa serikali za mitaa mwaka huu.

Aidha ,ametoa wito kwa wadauu wote kushiriki kikamilifu katika utekelezaji wa sera hiyo ili iwanufaishe wananchi wote na kuwaasa wananchi kuungana kupinga vitendo vya ukatili nchini.