RC SENYAMULE AWAONGOZA WANA KISESE UPANDAJI MITI

Posted on: February 12th, 2024

Mkuu wa Mkoa wa Dodoma Mh.Rosemary Senyamule amewaongoza wananchi wa kijiji cha Kisese Sauna katika zoezi la upandaji miti 3000 Mlima Sauna uliopo kata ya kisese halmashauri ya wilaya kondoa.

Mh.Senyamule amewataka wananchi wanaozunguka mlima kuutunza kwa kuacha kuuharibu kupitia shughuli mbalimbali za kibinadamu ikiwemo kilimo na ukataji miti kwa ajili ya mkaa na matumizi mengine.

"Niagize TFS kuhakikisha kila alielima kando ya mlima huu anapanda miti ya kutosha ndani ya wiki mbili kuanzia sasa na atakae kaidi shamba lake kufyekwa ifikapo mwanzoni mwa mwezi tatu".amesema Mh.Senyamule.

Kwa upande wake Mkuu wa Wilaya ya Kondoa Mh.Dkt Khamis amekabidhi mamlaka ya utunzaji na usimamizi wa mlima sauna kwa wakala wa uhifadhi misitu nchini(TFS)kwa kuzingatia sheria za uhifadhi akisimamia agizo la mkuu wa mkoa wananchi wote kuwajibika kupanda miti na kusimamia ili ikue ,kukataza uchomaji wa mkaa na kuagiza kuwachukulia hatua kwa yeyote atakae vunja sheria.

Katazo hilo limetokana na athari za shughuli za kibinadamu zilizopelekea unyeshaji wa mvua kubwa siku ya tarehe 25/01/2024 majira ya usiku ikisababisha kumeguka kwa sehemu ya mlima sauna ikiambatana na maporomoko ya tope ,mawe pamoja na magome ya miti na kusababisha uharibifu wa sehemu ya mashamba yaliyokaribu na mlima pamoja na miundombinu ya barabara kijiji cha kisese sauna.