RC SENYAMULE AFANYA ZIARA KONDOA DC

Posted on: May 13th, 2025

              Mkuu wa Mkoa wa Dodoma Mhe. Rosemary Senyamule amefanya ziara katika Halmashauri ya Wilaya ya Kondoa mapema Mei 13,katika vijiji vya  Kalamba na  Busi kwa kukagua miradi na kuskiliza kero za wananchi.

Akiwa kata ya Kalamba Mhe. Senyamule amekagua ujenzi wa nyumba za walimu wa shule ya msingi Foe wenye thamani ya Tsh Mil201 ulifadhiliwa na TEA (Tanzania Education Authority) na kuagiza ujenzi huo ukamilike kwa wakati ili walimu waweze kuhamia na kuwahimiza wananchiwa kata hiyo kushikamana katika sekta ya elimu kwani malengo ya mkoa ni kuongeza ufaulu kwa asilimia 100%.

"Nashukuru kwa mapokezi yenu mazuri ambayo kiukweli sikuyatarajia kweli Kondoa hamna jambo dogo, nimefurahi nimefika na kukutana na mambo mazuri , shule ina jumla ya walimu saba (7) na ina jumla ya nyumba za walimu nane (8) hizi juhudi za serikali ya awamu ya sita ikiongozwa na Rais wetu Dkt. Samia Suluhu Hassan ambayo inaangalia zaidi kesho kuliko leo, kwahiyo tumshukuru sana Rais wetu" alisema Mhe. Senyamule.

Kwa upande wake Diwani mwenyeji Mhe.  Salumu Mabote ambaye pia ni makamu Mwenyekiti wa Halmashauri ya Wilaya ya Kondoa ,ameishukuru serikali kwa kuendelea kuwakumbuka walimu akiboresha mazingira yao ya kazi akiahidi ushirikiano wa wananchi na uongozi wa shule hiyo katika kuongeza ufaulu wa wanafunzi katika kata hiyo.

Akiwa kata ya Busi Mhe. Senyamule ameskiliza na kutatua kero za wananchi zinazogusa sekta ya Umeme, afya ,ardhi,  maji, barabara maliasili na utalii na kwa kuzipatia majibu papo kwa papo kwa kushirikiana na wataalamu kutoka Halmashauri na taasisi za umma zilizopo Halmashauri.

Sambamba na utatuzi wa kero Mhe. Senyamule amewahimiza wananchi wa kata hyo kujiandikisha na kuboresha taarifa zao pamoja na kuwataka vijana wenye sifa kuwania nafasi mbalimbali za uongozi katika uchaguzi mkuu wa mwaka 2025, wananchi hao kuchangamkia fursa ya kilimo cha zao la apple ambacho kinahimili hali ya hewa ya  Dodoma.

Katika ziara hiyo Mhe. Senyamule aliambatana na timu ya wataalamu kutoka ofisi ya mkuu wa Wilaya, ofisi ya Mkurugenzi, na taasisi za umma ikiwemo TARURA, RUWASA, MKUNGUNERO na TANESCO.