NAIBU KATIBU MKUU WIZARA YA MIFUGO NA UVUVI AKAGUA UTEKELEZAJI WA KAMPENI YA CHANJO NA UTAMBUZI WA MIFUGO KONDOA DC

Posted on: July 22nd, 2025

Naibu Katibu Mkuu Wizara ya Mifugo na Uvuvi nchini Dkt.Edwin Mhede amekagua utekelezaji wa Kampeni ya Chanjo na Utambuzi wa Mifugo uliofanyika Halmashauri ya Wilaya ya Kondoa.

Haya yamejiri mapema Julai 21, 2025 akiambatana na mwenyeji wake Afisa Tarafa ya Pahi Bi.Mwasiti Kaweji kwa niaba ya Mkuu wa Wilaya ya Kondoa na timu ya wataalam kutoka halmashauri na wizarani wakishuhudia utekelezaji wa kampeni hiyo kwa mifugo jamii ya Ng'ombe, Mbuzi, Kondoo na Kuku katika kijiji cha Soera.

"Serikali imeweka kipaumbele kwenye sekta ya Mifugo ikilenga kukuza uchumi wa wananchi wake,ikileta 50% ya ruzuku ya chanjo na 100% ya ruzuku ya uendeshaji wa zoezi hili la uchanjaji. Uchanjaji huu ni kwa ajili ya kulinda Afya ya mifugo kwa kumpatia kinga itakayomfanya asiambukizwe homa ya mapafu (Ng'ombe), Sotoka (Mbuzi na Kondoo)na Tatu moja (Kuku)."alisema Dkt.Mhede.

Dkt.Mhede katika zoezi hilo amekabidhi vyombo vya usafiri (pikipiki 23) pamoja na vifaa mbalimbali vitakavyotumika katiza zoezi la uchanjaji na utambuzi wa mifugo kwa maafisa ugani wa mifugo halmashauri akiwataka kwenda na falsafa ya kazi iendelee.

Kwa upande wake Bi.Mwasiti Kaweji kwa niaba ya Mkuu wa Wilaya ya Kondoa, amemshukuru Mhe.Rais Dkt.Samia Suluhu Hassan kwa kufanikisha Uzinduzi wa kampeni ya chanjo na utambuzi wa mifugo nchini, halmashauri ya wilaya ya kondoa ikinufaika na vifaa mbalimbali vya chanjo, vitendea kazi kwa maafisa ugani (pikipiki23) ukilenga kukuza uchumi wa wananchi wa kondoa.

Naye Mkurugenzi Mtendaji wa Halmashauri ya Wilaya ya Kondoa Ndg.Shaban Millao ameahidi usimamizi wa halmashauri katika utekelezaji wa uchanjaji wa mifugo iliyopo ili zoezi lifanyike kwa ufanisi mkubwa, akipongeza juhudi za Serikali ya awamu ya sita katika kuboresha mazingira ya ufanisi kwa maafisa ugani ambayo yatachagiza ukuaji wa sekta ya Mifugo na Uvuvi.

Nao baadhi ya Wananchi wemeipongeza Serikali kupitia Wizara yake ya Mifugo na Uvuvi, ikiwakumbuka wafugaji dhidi ya usalama wa afya za mifugo yao wakiahidi kutoa ushirikiano kwa maafisa ugani wa mifugo waliopo kwenye vijiji vyao.

Kampeni hii ilizinduliwa rasmi na Mhe.Rais Dkt.Samia Suluhu Hassan  mkoani Simiyu mapema Juni 16, 2025 ambayo halmashauri ya wilaya ya kondoa ni halmashauri nufaika nchini ikipokea vifaa na chanjo kutoka Wizara ya Mifugo na Uvuvi ikilenga kudhibiti magonjwa ya kipaumbele kwa mifugo ikiwa ni pamoja na Homa ya Mapafu ya N'gombe (CBPP-Dozi 200,000), Sotoka ya Mbuzi/Kondoo (PPR-Dozi 280,000) na Mdondo kwa kuku(Tatu Moja-Dozi 460,000) utekelezaji wake ni wa miaka mitano.

Chanjo hizi zitatolewa kwa gharama nafuu ambapo Chanjo ya Homa ya Mapafu ya N'gombe (CBPP)na Sotoka ya Mbuzi/Kondoo itagharimu Tzs 500 tu kwa mfugo mmoja pamoja na Chanjo za Mdondo kwa Kuku (NCD-Tatu moja) bila malipo.

Kulingana na Sensa ya Mifugo ya mwaka 2019/2020 Halmashauri ina jumla ya mifugo ipatayo 1,272,533 ikitarajia kuchanja zaidi ya Ng'ombe 351,000 Mbuzi 295,000 Kondoo Elfu 78 Kuku 542,000 pamoja na zaidi ya Nguruwe zaidi ya Elfu 4.