MWENYEKITI WA KAMATI YA UONGOZI TAIFA-TASAF AFANYA ZIARA HALMASHAURI YA WILAYA YA KONDOA.

Posted on: March 20th, 2025

Mwenyekiti wa Kamati ya Uongozi Taifa TASAF,Ndg.Peter Ilomo amefanya ziara ya kutembelea Mradi wa Vyumba vya Madarasa na Matundu ya Vyoo katika Kijiji cha Mnenia.

Ndg.Ilomo ameshukuru na kupongeza ubora wa mradi baada ya kujionea hali ya mradi ulivyokwenda vizuri akiwahamasisha wananchi wa kijiji cha Mnenia kuwa na ushirikiano kwa kila miradi wanayoiendesha na kuhimiza wananchi hao kuelimishwa juu ya umuhimu wa vikundi walivyonavyo kwani wanaweza kufanikiwa kupitia vikundi hivyo.

Awali akiwasilisha taarifa yake kwa niaba ya Mkurugenzi Mtendaji wa Halmashauri,Mratibu wa TASAF Halmashauri Ndg.Donald Jidayi amesema

"Katika kipindi cha Utawala wa Serikali ya Awamu ya Sita chini Mhe.Rais Dkt.Samia Suluhu Hassan;mwaka wa fedha 2023/2024 Halmashauri ya Wilaya ya Kondoa ilipokea fedha kutoka Serikali kuu kupitia Mfuko wa Maendeleo ya Jamii (TASAF)kiasi cha Tzs 113,313,129.00 zilitolewa kwa ajili ya Ujenzi wa Miundombinu ya Shule Mpya ya Sekondari Mnenia kata ya Mnenia ."

Kwa upande wake Bw.Omary Mohamed ambaye ni mnufaika wa Mfuko wa Maendeleo ya Jamii,ameipongeza Serikali kwa kujenga shule hiyo na kuiomba kuwajengea nyumba za walimu na kuongeza barabara za mitaa.

Kwa upande wao wanafunzi wa shule hiyo Mpya ya Sekondari Mnenia wameishukuru Serikali kwa juhudi inayoendelea kutoa hasa katika sekta ya Elimu na kumpongeza Mhe.Rais Dkt.Samia Suluhu Hassan kwa ujenzi huo wa Madarasa wakimuahidi kufanya vizuri katika mitihani yao.

Mradi huu wa Ujenzi wa Shule Mpya ya Sekondari Mnenia uliibuliwa na jamii kupitia mkutano shirikishi wakati wa kuandaa mpango wa maendeleo katika kata ya Mnenia na kupewa nguvu na mchango wa TASAF kiasi cha Tzs 113,313,129.00,Mchango wa nguvu za wananchi kiasi cha Tzs 4,800,000.00.

Mradi huu upo tayari kutumika kama ilivyo kusudiwa kwa kuanza na wanafunzi 87 ambapo wasichana ni 40 na wavulana 47 kutoka katika vijiji vya Mnenia, Itundwi, Filimo na Kijiji cha Bambare.