MKUU WA MKOA WA DODOMA AKAGUA MIRADI KONDOA DC

Posted on: October 23rd, 2025

Mkuu wa Mkoa wa Dodoma, Mhe. Rosemary Senyamule, amefanya ziara ya kikazi katika Halmashauri ya Wilaya ya Kondoa kwa lengo la kukagua utekelezaji wa miradi mbalimbali ya maendeleo.

Katika ziara hiyo, Mhe. Senyamule alitembelea Hospitali ya Halmashauri ya Wilaya ya Kondoa iliyopo eneo la Bukulu, ambapo alikagua ujenzi na ukamilishwaji wa majengo mapya ya hospitali pamoja na kuangalia hali ya ustawi wa jamii katika eneo hilo.

Akiwa ameambatana na Mkuu wa Wilaya ya Kondoa, Mhe. Fatma Nyangasa, Mkurugenzi Mtendaji wa Halmashauri ya Wilaya ya Kondoa, Ndg. Shaban Millao, na Katibu Tawala wa Wilaya ya Kondoa, Bi. Christina Kalekezi, Mhe.Rosemary Senyamule  alitembelea pia mtoto Bisadya Idd Bakari (11), anayepatiwa matibabu katika Hospitali hiyo baada ya kuungua kwa moto.

Aidha, Mkurugenzi Millao alimshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kuipatia Halmashauri hiyo fedha zaidi ya shilingi bilioni 4.3 kwa ajili ya ujenzi wa zaidi ya majengo 14 ya hospitali hiyo, ambayo baadhi yake yameanza kutoa huduma bora kwa wananchi.

 “Tumeendelea kupokea fedha za kuendeleza miradi hii. Mwezi uliopita tumepokea shilingi milioni 800 kwa ajili ya ujenzi wa majengo ya dharura. Tutahakikisha tunakamilisha kazi hizi kwa ubora unaotakiwa na kwa kasi inayolingana na maelekezo ya Mheshimiwa Mkuu wa Mkoa,” alisema Mkurugenzi Millao.

Kwa upande wake, Mkuu wa Mkoa wa Dodoma, Mhe. Rosemary Senyamule, amewapongeza viongozi wa Wilaya ya Kondoa kwa ushirikiano wao na kwa kujali ustawi wa wananchi, hasa kusimamia maendeleo na matibabu ya mtoto Bisadya, akisisitiza umuhimu wa kuimarisha huduma za kijamii na afya katika maeneo yote ya mkoa.

“Serikali imewekeza kwa kiwango kikubwa katika sekta ya afya kupitia ununuzi wa dawa, vifaa tiba, na kuongeza wataalamu ili wananchi wapate huduma bora katika vituo vya afya. Tunahimiza jamii kuachana na tiba potofu zisizo na uthibitisho wa kitaalamu,” alisisitiza Mhe. Senyamule.

Akihitimisha ziara yake, Mhe. Senyamule amewataka watumishi wa umma na wananchi wote wa Wilaya ya Kondoa kujitokeza kwa wingi kushiriki katika uchaguzi mkuu wa Oktoba 29.