MKURUGENZI WA AFYA, USTAWI WA JAMII NA LISHE OR TAMISEMI AMPONGEZA DED MILLAO

Posted on: March 3rd, 2025

Mkurugenzi wa Afya na Ustawi wa Jamii OR-TAMISEMI Dkt.Rashid Mfaume amempongeza Mkurugenzi wa Halmashauri ya Wilaya ya Kondoa Ndg.Shaban Millao kwa moyo wa kumsaidia mtoto Abilayi Iddi kupata matibabu.

Dkt.Mfaume Ameyasema hayo alipokua katika ziara ya kutembelea miradi ya afya halmashauri na kumpongeza Mkurugenzi Millao.

"Nikupongeze Mkurugenzi kwa jambo ulilolifanya kwa mtoto Abilayi,ni kitu ambacho sijawahi kuona maeneo mengine tuna watoto wengi mitaani wenye uhitaji lakini kwa huyu mmoja umefanya kitu kikubwa sana hili linawezekana na  wengine tuige mfano wako katika kuwasaidia watoto wenye mahitaji maalum. "

Kwa upande wake Mkurugenzi wa Halmashauri ya Wilaya ya Kondoa Ndg.Shaban Millao amesema taarifa za hali ya mtoto huyo zilimfikia kupitia barua aliyoiandika mwalimu wake ya kuhitajika kwa msaada kwa mtoto huyo na kumlazimu kuacha shughuli zingine za kiofisi na kufika mara moja Shuleni Bereko kilipo kituo anachoishi mwanafunzi huyo.

Sambamba na hilo Dkt Mfaume alipata wasaa wa kumtembelea mtoto huyo kata ya Bereko akiambatana na Mkurugenzi Millao pamoja na ujumbe wake akimtia moyo mtoto huyo.

Mtoto Abilayi Iddi hadi kufikia sasa amefanikiwa kupata vipimo vya awali dhidi ya uvimbe unaomsumbua kwenye vidole vyake katika Hospitali ya Benjamin Mkapa iliyopo Jijini Dodoma na taratibu zingine za kimatibabu zinaendelea kufanyiwa kazi baada ya kugundulika kinachomsumbua. Mtoto Abilay anatarajiwa kufanyiwa upasuaji huo siku ya jumanne mara baada ya maandalizi ya awali kukamilika.