MKURUGENZI MILLAO ASISITIZA UTUNZAJI WA MAZINGIRA KONDOA DC

Posted on: January 20th, 2026

Mkurugenzi Mtendaji wa Halmashauri ya wilaya ya kondoa Ndg. Shaban Millao ametoa wito kwa wananchi wa wilaya ya kondoa kuzingatia kanuni bora za utunzaji wa mazingira katika maeneo yao.

Mkurugenzi Millao ameyasema hayo katika hafla iliyoandaliwa na Shirika la kimataifa la Prosper for Greening Community Base na kufanyika  katika kijiji cha kwamafunchi, kata ya Changaa Wilayani Kondoa

Akifafanua Zaidi Mkurugenzi Millao amesema kuwa ofisi yake inatambua mchango mkubwa unaotolewa na Shirika hilo katika kutunza mazingira na kupambana na athari za mabadiliko ya  tabia ya nchi.

" natoa rai kwa wananchi wa hapa, elimu ya vitendo mnayoipata kutoka kwa shirika hili mkaitumie na mdumishe ubora wa mazingira yetu"

" nimeskia kuwa shirika hili pia huratibu ziara na kuwapeleka mikoani baadhi ya wananchi kwenda kujifunza zaidi masuala ya upandaji miti na utunzaji wa mazingira, hakikisheni mnakuwa mabalozi wazuri siku zote katika jambo msilifanye tu ili mradi mpate zawadi zawadi" aliongeza Mkurugenzi Millao

Sanjari na hayo, Mkurugenzi Millao amelipongeza shirika hilo na kuahidi ushirikiano wa dhati kutoka Halmashauri ya wilaya hiyo huku akisisitiza ubunifu na utekelezaji wa sera za nishati safi ya kupikia kama sehemu ya uboreshaji wa mazingira.

Wakati huo huo, Mkurugenzi Millao amesisitiza  wazazi kusimamia suala la elimu kwa watoto wao.

Kwa upande wake Mkurugenzi wa Shirika hilo Ndg.Toribio, amemshukuru mkurugenzi kwa kuitikia wito wa kuhudhuria hafla hiyo na kumuahidi kutekeleza zaidi sera za utunzaji wa mazingira kwa kushirikiana na wananchi wa kijiji cha kwamafunchi.