MKURUGENZI KONDOA DC AUDHURIA SHAMBA DARASA KUHAMASISHA KILIMO BORA

Posted on: May 6th, 2025

Mkurugenzi Mtendaji wa Halmashauri ya Wilaya ya Kondoa Ndg.Shaban Millao amehudhuria mafunzo ya kilimo "Shamba Darasa"na Wakulima akihamasisha kilimo Bora.

Hayo yamejiri mapema Mei 21kata ya Soera, kijiji cha Bukulu yakiwakutanisha wakulima wa kata hiyo na vijiji na vijiji jirani wakishiriki tukio hilo lenye lengo la kukuza na kuhamasisha kilimo bora, Shirika lisilo la kiserikali Rikolto likiwa mwandaaji wa mafunzo hayo.

Akifungua mafunzo hayo Ndg.Millao ambaye alikua  Mgeni rasmi, ameishukuru Serikali kwa kuweka mazingira rafiki kwa wadau wa kilimo kupata fursa ya kutoa elimu katika sekta ya kilimo.

"Ni lazima tuishukuru Serikali kwa kuandaa mazingira mazuri ambayo yanawakaribisha wadau mbalimbali wa kilimo ambao ndio chanzo cha sisi kukutana mahali hapa leo ,Sisi ni moja kati ya Wilaya Saba zinazofaidika na mradi huu nchini"alisema Ndg.Millao.

Katika hatua nyingine Ndg.Millao amewahimiza wananchi hao kushiriki kikamilifu zoezi la Uchaguzi mkuu wa viongozi kwa nafasi ya Rais,Wabunge na Madiwani ifikapo mwezi Oktoba kwa amani na utulivu pamoja na Uboreshaji wa taarifa na kujiandikisha katika Daftari la kudumu la Wapiga kura awamu ya pili katika muda uliobaki kwa wale wenye sifa.

Awali katika taarifa yake Bwana Shamba Ndg.Godfrey Mwenda kutoka Rikolto amesema shirika hilo limetoa elimu kwa zaidi ya wakulima 8000 na mafunzo mengine yaliyotolewa kwa wakulima namna ya kulinda mazao yao yakiwa shambani na baada ya kutoka shambani,akiishukuru timu ya maafisa ugani kwa kufikisha elimu hiyo kikamilifu kwa wakulima.

Naye Diwani mwenyeji wa kata hiyo Mhe.Jamilah Gamaha amelishukuru Shirika hilo kwa elimu yao nzuri inayotolewa kwa wakulima kwakua ni chachu ya mabadiliko katika upande wa kilimo,akiwaasa wakulima wayafuate yale ambayo yametolewa na wataalam.

Tukio hilo limehudhuriwa na wadau mbalimbali wakiwemo wawakilishi kutoka taasisi za kifedha ikiwemo Benki,Wanunuzi wa mazao,Wakulima,Wadau wa Mbegu n.k.

Shirika la Rikolto linatekeleza Mradi wa Vijana Kilimo Biashara (VKB)katika Halmashauri ya Wilaya ya Kondoa likiwa na lengo la kuongeza uzalishaji wa mazao mbalimbali ikiwemo Alizeti,Mtama,Mbogamboga na Matunda likiwahamasisha wakulima kutumia pembejeo zilizobora ili kuongeza uzalishaji,kumwezesha mkulima kulinda upotevu wa mazao.Katika kuyafikia malengo shirika hilo limeanzisha Mashamba darasa 14 kwenye kata 8 ndani ya Halmashauri ya Wilaya ya Kondoa.