MASHIRIKA YASIYO YA KISERIKALI WILAYANI KONDOA YAWASILISHA TAARIFA YA UTENDAJI KAZI KWA MWAKA WA FEDHA WA 2024/2025

Posted on: June 17th, 2025

Mashirika yasiyo ya Kiserikali nchini kwa Wilaya ya Kondoa Mkoa wa Dodoma yamewasilisha taarifa za utendaji kazi uliofanywa na mashirika hayo kwa kipindi cha mwaka 2024/2025.

Hayo yamejiri mapema Juni 13, 2025 katika Ukumbi wa Mikutano Kondoa Irangi uliopo Kondoa Mjini ukiwakutanisha Maafisa Maendeleo ya Jamii kutoka Halmashauri za Wilaya na Mji Kondoa pamoja na Mashirika hayo wakiwasilisha shughuli mbalimbali zilizotekelezwa kwa kipindi cha mwaka 2024/2025 katika halmashauri hizo.

Akifungua kikao cha pamoja na mashirika hayo, Ndg.Wenceslaus Mbilango ambaye ni Mkuu wa Divisheni ya Maendeleo ya Jamii Halmashauri ya Mji Kondoa amesema lengo la kukutana na mashirika hayo ni kujadili shughuli walizotekeleza katika kipindi cha mwaka wa fedha 2024/2025 katika Wilaya ya Kondoa itakayorahisisha  kubainisha mafanikio na changamoto walizozitatua kwa pamoja.

Sambamba na uwasilishwaji wa taarifa za mashirika hayo wito umetolewa dhidi ya ushirikishwaji wa wataalam kutoka Halmashauri hizo wakati wa utekelezaji wa shughuli zao ndani ya kata nufaika, kwa kuzingatiaji kanuni, taratibu na sheria za  nchi katika uendeshaji wa mashirika hayo pamoja na ushiriki wao katika vikao rasmi vinavyowakutanisha pamoja kila robo ya mwaka wa fedha.

Miongoni mwa Mashirika yaliyojitokeza katika kikao hicho ni pamoja na INADES FORMATION, RIKOLTO, TAHEA, CONVOY OF HOPE TZ, JUST , MTETEZI WA MAMA NA MTOTO na KASVA FOUNDATION ambayo yamefanikiwa kutekeleza shughuli mbalimbali zinazogusa jamii ikigusa sekta mbali mbali kama vile Elimu, Afya, Maji, Lishe, Kilimo, Mazingira, Ujasiriamali, Msaada wa Kisheria, Maendeleo ya Wanawake, Mabinti na Vichinjio.