MAFUNZO YA UKUSANYAJI WA KODI YA MAJENGO (PROPERTY TAX) YAFANYIKA KONDOA DC

Posted on: June 13th, 2025

Kaimu Mkurugenzi wa Halmashauri ya Wilaya ya Kondoa Ndg.Immanuel Mvungi, amefungua rasmi Mafunzo ya ukusanyaji wa Kodi ya Majengo ambapo Kodi sasa itakusanywa na Mamlaka za Serikali za Mitaa badala ya Mamlaka ya Mapato Tanzania (TRA).

Lengo kubwa la Mafunzo haya ni kuwawezesha wamiliki wote wa nyumba ndani ya halmashauri kuchangia maendeleo ya nchi yao kupitia ulipaji kodi ya majengo ambayo inakadiriwa kufikia Tshs.800,000,000/= kwa Mwaka.

Akifungua mafunzo hayo Ndg.Mvungi amesema "Maafisa Watendaji wa Kata na Vijiji, zingatieni mafunzo haya kwani ninyi ni viungo muhimu na ndio watekelezaji wakubwa katika kukusanya Mapato ya Serikali katika chanzo hiki".

Kodi hii itakuwa inakusanywa Kidigitali,  ambapo Maafisa Watendaji wa Kata na Vijiji ambapo kwa hatua za awali, takwimu sahihi za majengo yanayopaswa kulipiwa kodi hii yataainishwa kidigitali kupitia Mfumo Rafiki wa Kidigitali wa"Open Data Kit" (ODK) na hatimaye wamiliki kupatiwa Ankara ambazo zitatolewa katika mfumo wa kukusanya Mapato ya Serikali (TAUSI) na kufikishwa kwa mlipa kodi na Afisa Mtendaji wa Kijiji na hatimaye Mlipa kodi atalipia kodi yake kwa mujibu wa Sheria, kidigitali.

Kodi hulipwa kwa mujibu wa Sheria na wamiliki wa nyumba za makazi na Biashara kote nchini kwa kiasi cha Tshs.18,000 kwa nyumba ya Kawaida  na Tshs.90,000/= kwa kila sakafu kwa majengo ya ghorofa.

Halmashauri ya Wilaya ya Kondoa inakadiriwa kuwa na nyumba zipatazo 53,206 ambapo ni nyumba 15,842 pekee ndizo zenye umeme wa Gridi ya Taifa na hulipa kodi hii ya Majengo kupitia Mfumo wa Lipia Umeme kadiri Unavyotumia (LUKU).