MAANDALIZI YA MSIMU MPYA WA KILIMO YATOLEWA KONDOA DC

Posted on: October 24th, 2024

Halmashauri ya Wilaya ya Kondoa kupitia Divisheni ya Kilimo, Mifugo na Uvuvi imeanza zoezi la utoaji wa elimu kwa wakulima wa Halmashauri ya Wilaya ya Kondoa katika kuelekea msimu mpya wa kilimo.

Wakiwa kijiji cha Humai kata ya Soera, timu ya Wataalam kutoka Divisheni ya Kilimo, Mifugo na Uvuvi kwa kushirikiana na Kampuni ya One Acre Fund wamejumuika pamoja na Wakulima na Wanakijiji  waliojitokeza katika mkutano wa hadhara wakiwahamasisha kuhusu kanuni bora za kilimo kuelekea msimu mpya wa kilimo.

Akizungumza kwa njia ya mahojiano maalum Bi.Viasa Mpendu, ambaye ni Afisa Kilimo toka Divisheni husika, amesema "lengo la Mkutano huu ni kuwahamasisha wakulima juu ya kanuni bora za kilimo ikiwemo Upandaji kwa wakati wa mazao, matumizi ya viwatilifu, mbolea, kujisajili kwenye mfumo wa mbolea ya ruzuku, wakulima kuchangamkia huduma ya kupimiwa udongo kabla ya msimu wa kilimo kuanza, elimu ya Mifugo pamoja na kuwasogezea huduma ya uuzaji wa mbegu inayofanywa na kampuni ya One Acre Fund".

Kwa upande mwakilishi kutoka Kampuni ya One Acre Fund Ndg. Enhart Israel amesema wameanza kufanya majaribio ya kuwahudumia wakulima wa kanda ya kati (Dodoma na Singida) baada ya Nyanda za kusini kufanya vizuri, wakianzia Halmashauri ya Wilaya ya Kondoa kwa mkoa wa Dodoma na kukabidhi mbolea ya Chokaa kwa wakulima 86 kutoka kata za Soera, Salanka na Bereko lengo likiwa ni kupunguza tindikali kwenye udongo baada ya sampuli za udongo kupimwa na Halmashauri (awali) na sasa kuwauzia mbegu bora za mahindi, alizeti na maharage (Highbreed seed).

Kwa upande wao baadhi ya Wakulima walionufaika na elimu hiyo na Ununuzi wa mbegu waipongeza halmashauri kwa kuanza mapema zoezi la kuhamasisha wakulima kuhusu msimu mpya wa kilimo wakifurahia kusogezewa huduma ya kununua mbegu za mazao kilimo katika mashamba ya yao kwa gharama nafuu.

Zoezi hili la uhamasishaji wakulima wa Halmashauri ya Wilaya ya Kondoa ni zoezi endelevu katika kuelekea msimu mpya wa kilimo kutokana na jitihada za Serikali ya awamu ya sita chini ya Mhe.Rais Dkt.Samia Suluhu Hassan kuboresha sekta ya kilimo nchini kwa kuwawezesha maafisa ugani nchini vitendea kazi ikiwemo Pikipiki, Vishikwambi na Kipimia Udongo ambavyo Halmashauri ya Wilaya ya Kondoa imenufaika navyo.