KONDOA DC YATOA ZAIDI YA MILIONI 758 ZA MIKOPO KWA VIKUNDI VYA WANAWAKE,VIJANA NA WATU WENYE ULEMAVU

Posted on: October 24th, 2025

Halmashauri ya Wilaya ya Kondoa imetoa jumla ya Tzs 657,029,012 kwa kipindi cha mwaka wa fedha 2020/2025 na Tzs 101,825,125 kwa kipindi cha robo ya kwanza mwaka wa fedha 2025/2026 kwa vikundi vya wanawake,vijana na watu wenye ulemavu.

Hayo yamebainishwa katika Hafla ya utoaji mikopo ya 10% kwa vikundi vya wanawake,vijana na watu wenye ulemavu mapema Oktoba 24,2025 mgeni rasmi akiwa ni Mkuu wa Wilaya ya Kondoa Mhe.Fatma Nyangasa.

Mhe.Nyangasa ameipongeza Halmashauri ya Wilaya ya Kondoa kwa kuendelea kutekeleza agizo la Mhe.Rais Dkt.Samia Suluhu Hassan la utoaji wa mikopo ya 10% ya mapato ya ndani kwa vikundi ikilenga kuwakwamua wananchi kiuchumi,kupunguza umasikini na kuchochea maendeleo ikiwanufaisha zaidi wanufaika.

"Ndugu wanufaika niwapongeze kwa kuchangamkia fursa hii,fedha mlizopata mkatumie kwa matumizi kusudiwa na tukiwahamasisha wenzetu kujitokeza kwa wingi kuomba mkopo huu na turejeshe kwa wakati"alisema Mhe.Nyangasa.

Pia katika hafla hiyo Mhe.Nyangasa ametumia fursa hiyo kuwahimiza wanufaika hao kuwahimiza wananchi wenza kujitokeza kwa wingi kupiga kura katika vituo elekezi vya kupigia kura kwa wananchi wote waliotimiza sifa za kupiga kura siku ya Tarehe 29/10/2025.

Awali Akiwasilisha taarifa yake kwa mgeni rasmi, Mkuu wa Divisheni ya Maendeleo ya Jamii Bi.Raiya Naser amesema kwa kipindi cha miaka mitano Halmashauri imetoa kiasi cha Tzs 657,029,012 ikiwa Sh 319,574,000 kwa wanawake, Sh.230,000,000 kwa vijana na Sh.107,023,500 kwa watu wenye ulemavu (wanawake 553, vijana193 na watu wenye ulemavu 176).

Pia katika kipindi cha mwaka wa fedha 2025/2026 kwa robo ya kwanza Halmashauri imetenga kiasi cha Tzs 101,827,125 kwa ajili ya kukopesha vikundi kwa mgawanyo wa Tzs 40,730,

850 Wanawake, Tzs 40,730,850 vijana na Tzs 20,365,425 kwa watu wenye ulemavu.