KONDOA DC YABEBA MAKOMBE MASHINDANO YA UMITASHUMTA 2024 MKOA WA DODOMA

Posted on: June 10th, 2024

Halmashauri ya Wilaya ya Kondoa imeibuka kidedea kwa kubeba Makombe mawili, katika mashindano ya UMITASHUMTA ngazi ya Mkoa kupitia mchezo wa Mpira wa Miguu (wavulana)na Mpira wa Pete (Wasichana).

Akiwapokea kwa shangwe, nderemo na bashasha jumla ya wanafunzi 92 kutoka mbali mbali za Msingi za halmashauri ya Wilaya ya Kondoa, Mkurugenzi Mtendaji Ndg.Shaban Millao amewapongeza kwa kushiriki na kufanya vizuri katika mashindano hayo na kuwataka kuongeza bidii zaidi katika mashindano yajayo.

Kwa Upande wake Afisa Michezo na Utamaduni Halmashauri Bw.Mohamed Chillo amesema mashindano hayo yalianzia ngazi ya shule, Kata, Kanda hadi ngazi ya wilaya ili kupata timu za michezo mbali mbali wapatao 92 ambao wameshiriki katika  mashindano ya UMITASHUMTA ngazi ya mkoa kwa kuibuka na ushindi katika fainali dhidi ya Chamwino (Mpira wa miguu) na ushindi dhidi ya Chemba (Mpira wa Pete).

Awali akimkaribisha Mkurugenzi Mtendaji, Afisa Elimu Awali & Msingi Bw.Eugen Shirima amesema mashindano hayo yamefanyika kwa muda wa siku nne, kuanzia tarehe 23-26 /05/2024 kwa kupata ushindi kwenye michezo ya mpira wa miguu na pete,mshindi wa pili kwenye riadha, mshindi wa tatu kwenye mchezo wa mpira wa mikono pamoja na kuchaguliwa kwa wanafunzi 14 kati ya 92 kujiunga kwenye timu ya mkoa ambayo itashiriki mashindano hayo kitaifa mkoani Tabora.

Pia kwa niaba ya timu ya wanafunzi hao Abdulhabi Ayubu kutoka Shule ya Msingi Hurui na  Asia Hassan kutoka Shule ya Msingi Madisa,  wamesema wamejiskia furaha kushiriki na kushinda kwa baadhi ya michezo walioshiri na kuahidi kuongeza bidii katika michezo wakizingatia fursa mbalimbali za michezo nchini.

Mashindano haya ya UMITASHUMTA na  UMISSETA kwa shule za Msingi na Sekondari kimkoa, yamefanyika katika shule ya Sekondari Dodoma yakizinduliwa rasmi na Katibu Tawala Mkoa Ndg.Kaspa Mmuya kwa niaba ya Mkuu wa Mkoa wa Dodoma Mh.Rosemary Senyamule yakiwa ni mashindano ya 50 tangu kuanzishwa kwake nchini.