KAMATI YA USHAURI WILAYA KONDOA YATOA MAONI KUELEKEA MAANDALIZI YA DIRA YA TAIFA YA MAENDELEO YA MWAKA 2025-2050

Posted on: August 3rd, 2024

Kamati ya Ushauri ya Wilaya ya Kondoa ikiongozwa na Mwenyekiti wake Mkuu wa Wilaya ya Kondoa Mhe.Fatma Almasi Nyangasa imekusanya maoni ya wajumbe wa kikao hicho dhidi ya Maandalizi ya Dira mpya ya Taifa ya Maendeleo ya Mwaka 2025-2050.

Kikao hicho maalum kimewakutanisha wajumbe kutoka Ofisi ya Mkuu wa Wilaya, Ofisi za Wakurugenzi wa Halmashauri za Wilaya na Mji Kondoa, Waheshimiwa Madiwani, Wakuu wa Idara na Vitengo toka Halmashauri zote mbili, watumishi wa umma, Viongozi wa Dini,Wafanyabiashara, Makundi maalum,Uwakilishi Vyama vya Wafanyakazi,Vyama vya Siasa pamoja na taasisi za fedha katika ukumbi wa Mikutano Kondoa Irangi uliopo Kondoa Mjini.

 Kamati hiyo imefanya Tathimini ya pamoja dhidi ya Dira ya Taifa ya Maendeleo ya Mwaka 2000-2025, wakijadili hatua mbalimbali za maendeleo Taifa limepitia na kutoa Pongeza za dhati kwa serikali ya Chama tawala CCM kwa jinsi ilivyosimamia maendeleo ya nchi katika nyanja zote ikiwemo Elimu, Afya, Usafiri na usafirishaji, Viwanda na Biashara, Kilimo na hali ya utulivu na Amani iliyotawala kote nchini. Wajumbe hao walitoa maoni kadhaa ili kuboresha maendeleo ya nchi katika njanja zote ikiwa ni mchango wao wa mapendekezo kuelekea maandalizi ya Dira mpya ya Taifa mwaka 2025-2050.

Akitoa taarifa fupi ya tulikotoka na tunakokwenda, Mwezeshaji wa zoezi hilo Bi.Regina Christopher Harioway, Mtakwimu wa Halmashauri ya Mji Kondoa, alieleza kwamba kama Taifa tumepitia Dira tatu za Maendeleo ya Taifa la Tanzania ambazo ni Dira ya kujipatia Uhuru na baada ya kupata Uhuru mwaka 1961),  Dira ya Azimio la Arusha (mwaka 1967) pamoja na Dira ya Maendeleo ya Taifa inayofikia tamati mwaka 2025 ambayo imedumu tangu mwaka 2000, zote kwa pamoja zikiwa zinalenga kudumisha mila, desturi, silka, maadili ya jamii yanayokwenda na wakati, Maisha Bora na mazuri, amani, utulivu na umoja, utawala na uongozi Bora, jamii iliyoelimika na inayopenda kujifunza zaidi pamoja na uchumi wenye uwezo wenye ushindani na kujiletea ukuaji wa kudumu kwa maslahi ya watu wote.