JUMLA YA TANI 2 ZA MBEGU YA ALIZETI KUUZWA KONDOA DC KWA MKOPO NA KWA GHARAMA NAFUU

Posted on: December 29th, 2024

Halmashauri ya Wilaya ya Kondoa kupitia Divisheni ya Kilimo, Mifugo na Uvuvi kwa kushirikiana na Kampuni ya ONE ACRE FUND imezindua zoezi la uuzaji na ukopeshaji wa mbegu ya Alizeti aina ya Hysun kwa Wakulima tarehe 27 Disemba, 2024.

Akizungumza na wakulima wa vijiji vilivyoanza kupata huduma hiyo, Mratibu wa zoezi hilo, Ndg.Raphael Challema amesema zao la alizeti ni zao la kimkakati katika Halmashauri ya Wilaya ya Kondoa hivyo kuna kila sababu za kuhakikisha wakulima wanalima zao hilo kwa tija na kwa kutumia mbegu bora.

Kwa upande wake Mkuu wa Divisheni ya Kilimo, Mifugo na Uvivu, Ndg. Juvenal Munishi amewasisitiza wakulima kuchangamkia fursa ya kulima zao hilo ili kuongeza tija na kipato.

Ndg.Munishi amesema pia kuwa Serikali imeleta mbegu bora ya alizeti aina ya Sunbloom kiasi cha tani 15 na zimesambazwa kwenye kata zote 21. Bei ya kilo 2 yenye uwezo wa kupandwa ekari 1 inauzwa kwa bei ya shilingi 20,000 badala ya shilingi 70,000 na  kuwahimiza wakulima kupata huduma za mbolea za ruzuku kutoka vituo vya Bereko, Bukulu, Loo, na Haubi.

Sambamba na hilo Ndg. Munishi amewakumbusha wakulima kuendelea kuandaa mashamba na kutumia kanuni za kilimo kilimo kwa lengo la kuzalisha kwa tija.

Kwa upande wake mwakilishi kutoka Kampuni ya One Acre Fund Bw.Salehe Joram amesema lengo la zoezi hilo ni kubadili mtazamo wa mkulima kwa kumletea mbegu bora Ili akilima leo kesho afanye maamuzi kwa ajili ya kwenda na kasi ya kilimo cha kisasa.

Zoezi hili ni endelevu na miongoni mwa vijiji vilivyopatiwa huduma hiyo ni pamoja na Salanka,Masawi,Bukulu,Mnenia,Pahi,Bumbuta na Humai.Bei ya mbegu kwa kilo 1 ni shilingi 35,000 badala ya shilingi 50,000. Ikiwa mkulima anahitaji mbegu hizi kwa mkopo atapaswa kulipia shilingi 18,500 kwa mara ya kwanza na kisha atalipia kiasi kilichobaki ndani ya miezi 3.