ELIMU YA UZUIAJI UPOTEVU WA NAFAKA KUWA SULUHISHO LA USALAMA WA CHAKULA KONDOA DC

Posted on: May 11th, 2025

Ushirikiano madhubuti baina ya Halmashauri ya Wilaya ya Kondoa na Shirika lisilo la kiserikali Rikolto umeendelea kuchochea maendeleo ya Kilimo kwa Wakulima dhidi ya Elimu ya Usalama wa Chakula.

Haya yanajiri ikiwa ni baada ya Utoaji wa Mafunzo ya Awali katika Mradi wa Vijana Kilimo Biashara (VKB)kwa Maafisa Ugani ngazi ya Kata na Viongozi Wakulima, Uanzishwaji wa Mashamba darasa 15 kwa vikundi vya Wakulima juu ya uzalishaji bora wa mazao ya Alizeti na Mtama ambayo kwa sasa yako katika hatua ya mavuno.

Akifungua mafunzo ya siku moja kwa Wataalam hao na Viongozi Wakulima, Mkuu wa Divisheni ya Kilimo, Mifugo na Uvuvi Ndg.Juvenal Munishi amesema mafunzo hayo yanalenga kujenga uelewa wa pamoja dhidi ya namna bora ya kuzuia upotevu wa nafaka, akiwahimiza kuyatumia mafunzo hayo kwenda kuwafundisha wakulima mafunzo hayo kwa uhalisia yatakayochochea mabadiliko dhidi ya usalama wa chakula.

Kwa upande wake Mratibu wa Mradi wa Vijana Kilimo Biashara (VKB) Ndg. Inocent Usiri amesema matarajio ya mafunzo hayo yanalenga kubadilishana uzoefu pamoja na kufahamu teknolojia mbalimbali zinazoweza kutumika kwa ajili ya usalama wa chakula  kabla na baada ya mavuno.

Mafunzo hayo yamekwenda sambamba na mada mbalimbali zikiwemo ; Upotevu wa Mazao, Uvunaji wa Mazao, Usafirishaji na Ukaushaji, Upukuchuaji, Uchambuaji na Upangaji madaraja pamoja na Uhifadhi wa mazao.

Kata zinazonufaika na Mradi huu wa Vijana Kilimo Biashara(VKB) ni pamoja na Thawi, Bereko, Salanka, Soera, Kikore Kisese Itololo, Mnenia, Pahi, Keikei, Haubi,Kikilo,Hondomairo na Kalamba.

Hatua hii ìnalenga kubadilisha maisha ya wakulima zaidi ya 8000 na kuimarisha kilimo endelevu katika Halmashauri ya Wilaya ya Kondoa.