DED MILLAO AWAPA KONGOLE MADAKTARI BINGWA

Posted on: December 21st, 2024

Mkurugenzi Mtendaji wa Halmashauri ya Wilaya ya Kondoa Ndg.Shaban Millao ametembelea hospitali ya halmashauri iliyopo Bukulu kujionea kambi ya tiba za Kibingwa zinazotolewa hospitali ni hapo na Madaktari Bingwa toka Hospitali ya Kanda ya Kati ya Benjamin Mkapa iliyopo Jijini Dodoma.

Ndg.Millao amepokelewa na mwenyeji wake Mganga Mkuu wa Hospitali ya Halmashauri Dkt. Alpha Kwilasa akiambatana na Mwenyekiti wa Kamati ya Afya, Elimu na Maji Mhe.Rahim Salim na wakajionea shughuli za kitabibu zinazofanywa na Madaktari Bingwa kutokea Hospitali ya Benjamin Mkapa kwa kushirikiana na Taasisi ya SOTAC convoy kutoka nchini Uholanzi.

Ndg.Millao akiwa hospitalini hapo amempongeza Mhe.Dkt Samia Suluhu Hassan Rais wa Jamhuri ya Muungano wa Tanzania kwa uwekezaji mkubwa alioufanya katika sekta ya Afya kwa kuboresha na kujenga miondombinu, ununuzi wa vifaa tiba vya kisasa katika vituo vyote vya kutolea huduma nchini.

Sambamba na pongezi hizo ndg.Millao aliwahamasisha wananchi kutumia fursa hiyo adhimu ya uwepo wa madaktari bingwa kwa ajili ya kuchunguza afya zao.

Huduma hii ya madaktari bingwa katika hospitali ya Halmashauri imeanza kutolewa mapema Disemba 16 kwa kuzinduliwa na Mbunge wa Jimbo la Kondoa na Waziri wa Mifugo na Uvuvi Mhe.Dkt Ashatu Kijaji mbele ya wananchi waliojitokeza hospitalini hapo ambayo ukomo wake ni tarehe 20/12/2024.

Huduma za Kibingwa zinazotolewa ni tiba kwa magonjwa ya akina mama, mifupa, upasuaji na uvimbe, mfumo wa mkojo, Figo, Mfumo wa fahamu, Macho, Usingizi na Ganzi salama.