DC NYANGASSA ASIKILIZA KERO ZA WANANCHI KATA YA KISESE-KONDOA DC

Posted on: August 1st, 2024

Mkuu wa Wilaya ya Kondoa Mhe.Fatma Almas Nyangassa amefanya  Ukaguzi wa Utekelezaji wa Mradi wa Maji Kisese Sauna wenye thamani ya Tsh Mil 913 pamoja na kusikiliza kero za wananchi kata ya Kisese.

Mhe.Nyangassa amefanikiwa kukagua Chanzo cha Maji kitakachowanufaisha wananchi baada ya Mradi kukamilika, alishuhudia maendeleo ya mradi ulipofikia na kuagiza kuongeza kasi ya ukamilishaji mradi kwa wakati na ubora hadi kufikia tarehe 30/09/2024 mradi uwe umekamilika.

Akiwa kwenye Mkutano wa hadhara na wananchi wa kata hiyo  Mhe.Nyangassa amesikiliza na kutatua kero zinazowakumba wananchi hao zikiwemo za sekta ya Maji, Afya,TASAF na Barabara akiahidi kuzifanyia kazi.

Mhe.Nyangassa amesisitiza ushirikiano baina ya Jamii na Viongozi kwa maendeleo ya Kondoa, wananchi kujiandikisha katika Daftari la kudumu la Wakazi (Uchaguzi wa Serikali za Mitaa) na Daftari la kudumu la Wapiga kura (Uchaguzi Mkuu mwaka 2025) pamoja na Upingaji Ukatili wa Kijinsia dhidi ya watoto na wazee.

Kwa upande wake Diwani mwenyeji, Mhe.Abubakari Maleda amempongeza Mhe.Nyangassa kwa kufika kusikiliza na kutatua kero kwenye kata yake akielezea tumaini lake juu maelekezo aliyoyatoa kwa uongozi wa RUWASA-KONDOA na Mkandarasi wa Mradi wa Maji kwenye kata hiyo.

Mradi wa Maji Kisese Sauna unatekelezwa na Mkandarasi aitwae TS SOLUTION LTD na hadi sasa mradi umetekelezwa kwa asilimia 77 ya mradi ikijumuisha Ujenzi wa Dakio (Intake), Ukarabati wa Tanki la Maji lenye uwezo wa ujazo wa lita 35,000,Ujenzi wa Nyumba ya Mlinzi, Ujenzi wa Tanki la Maji la lita 75,000, Ujenzi wa Vituo vya Maji 15, Ujenzi wa Malambo 2, Ujenzi wa Ofisi  CWBSO pamoja na ulazaji wa Bomba la kusambazia maji Mita 18,544.

Mradi huu unalenga kuwanufaisha jumla ya wakazi 6,642 wa vijiji vya Kisese Sauna na Mapinduzi kwa kutatua adha ya maji inayowakumba wananchi hao kwa muda mrefu wakifuata maji katika vijiji jirani.