DAS KALEKEZI AWAONGOZA WANAWAKE KONDOA DC KATIKA KUIHUDUMIA JAMII

Posted on: March 10th, 2025

Katibu Tawala Wilaya ya Kondoa Bi.Christina Kalekezi, amewaongoza wanawake na wananchi katika kufanya matendo ya huruma kwa Bi.Mwanaftari mkazi wa Kijiji cha Bereko.

Hayo yamejiri mapema Machi 6, 2025 katika kuadhimisha siku ya wanawake ngazi ya halmashari yaliyofanyika kata ya Bereko ikiwakutanisha wanawake toka  makundi mbali mbali wakiwemo viongozi, watumishi wa Umma, kina mama wanajamii,  wasichana na wadau wengine pamoja na wananchi kwa ujumla.

Bi.Kalekezi amesema kilichofanywa na wanawake hao ni ibada kwa Mwenyezi Mungu, akiwaasa wanawake hao kujifunza kubebeana mahitaji yao kwa kuinuana pamoja.

"Niwapongeze sana wanawake wenzangu kwa juhudi za kumuibua mwana mama huyu kwa kumpa mtaji utakaomsaidia kuendesha familia yake, kitendo hiki mlichokifanya mmemuheshimisha Mhe.Rais.Dkt Samia Suluhu Hassan akiwa mfano wa kuigwa katika jukwaa la kumwezesha mwanamke" ameongeza Bi.Kalekezi.

Kwa upande wake Kaimu Mkurugenzi wa Halmashauri Ndg.Emmanuel Mvungi amewatia shime wanawake hao kuendeleza juhudi hizo katika kuwaibua watu wenye uhitaji akielezea juhudi zinazofanywa na Serikali katika kuwasaidia wanawake, vijana na watu wenye mahitaji maalum.

Awali katika taarifa yake Mkuu wa Divisheni ya Maendeleo ya Jamii Halmashauri Bi.Raiya Nasser amesema katika kuadhimisha siku hiyo wanawake wa halmashauri  hiyo walikubaliana kurudisha kwa jamii kwa kumkabidhi Bi.Mwanaftari mwanamke mjane mwenye watoto 4 (watatu wana ulemavu) Mradi wa ufugaji mbuzi 3, Bima za Afya kwa familia yake pamoja na ununuzi wa mahitaji maalum ya nyumbani kwa fedha iliyobaki.

Naye Bi.Mwanaftari amewashukuru wanawake hao kwa tendo la huruma kwa Familia yake akiwatakia heri wote walioguswa na hali yake na kuamua kumsaidia.