CRESD KUWANUFAISHA WAKULIMA VIJANA WA ZAO LA ALIZETI-KONDOA DC

Posted on: September 15th, 2025

Taasisi ya ubunifu na uwezeshaji wa maendeleo vijijini (CRESD) kwa kushirikiana na Divisheni ya Kilimo, Mifugo na Uvuvi ya Halmashauri ya Wilaya ya Kondoa wametoa elimu juu ya kilimo cha kisasa na Kanuni Bora za kilimo cha alizeti.

Akizungumza wakati wa uwasilishaji katika mafunzo yaliyofanyika katika ukumbi wa Kondoa Irangi, Msimamizi wa Mradi wa Vijana na ujasiriamali na maendeleo lishe yajayo (YEFFA) Bw. Jackson Lumbagi, amesema kuwa mafunzo hayo yamelenga katika kuwajengea uwezo wakulima viongozi katika ulimaji wa zao la alizeti kwa kutumia mbinu za kisasa na endelevu.

 Aidha, Bw. Lumbagi ameongeza kuwa utoaji wa elimu ya ugani kwa wakulima viongozi (VBA) unalenga kupunguza upotevu wa mazao hasa zao za alizeti na kulifanya zao la kimkakati.

"Baada ya mafunzo haya tunatarajia kila mkulima Kiongozi atakwenda katika kata yake atashirikiana na Afisa Ugani wa eneo hilo kuwafundisha na kueneza elimu hii kwa wakulima angalau 200 wa eneo husika"

"Mafunzo  haya ni ya siku mbili na yanajumuisha Wakulima Viongozi 50 kutoka katika wilaya mbili za Kondoa na Chemba" aliongeza Bwn. Lumbagi

Kwa Upande wake Afisa Kilimo kutoka Ofisi ya mkuu wa mkoa wa Dodoma Bi. Julieth Ezidory ameipongeza taasisi ya  CRESD kwa kuandaa mafunzo hayo na kuahidi ushirkiano wa dhati katika sekta hiyo ya kilimo.

"Lengo la Serikali yetu ni kuwasaidia wakulima na kuwanyanyua kiuchumi kupitia mafunzo mbalimbali na uwezeshaji  kwa hiyo ni juu yenu kama wakulima viongozi kujitoa kwa hali na mali kuhakikisha kuwa mnapata kilicho bora kabisa" aliongeza  Bi.Julieth

Nae mwenyekiti wa wakulima viongozi hao (VBA) Bihulu Omar Ali ameshukuru CRESD kwa mafunzo hayo na kuahidi kuyafanyia kazi ili kuongeza tija katika zao la alizeti sanjari kutoa mafunzo hayo kwa wakulima wengine katika maeneo mbali mbali vijijini.

Mafunzo hayo ya elimu kwa mkulima katika uzalishaji wa zao la alizeti kisasa yameandaliwa chini mradi endelevu wa YEFFA na kufadhiliwa na taasisi ya muungano wa mapinduzi chanya ya kijani barani Africa (AGRA)  ambapo Wilaya ya Kondoa ni moja kati ya wanufaika wa mafunzo Katika mkoa wa Dodoma.