CHMT KONDOA DC YANG'ARA KATIKA USIMAMIZI WA UTOAJI WA HUDUMA ZA AFYA

Posted on: March 3rd, 2025

Timu ya Halmashauri ya Uendeshaji wa Huduma za Afya (CHMT)Halmashauri ya Wilaya ya Kondoa imepongezwa kwa kufanya vizuri katika usimamizi wa huduma za afya.

Pongezi hizo zimetolewa na Ujumbe kutoka Ofisi ya Mkurugenzi wa Huduma za Afya, Lishe na Ustawi wa Jamii OR-TAMISEMI ukiongozwa na Dkt.Rashid Mfaume alipotembelea na kukagua huduma za afya, lishe na ustawi wa jamii katika Halmashauri hiyo.

"Niwapongeze kwa utayari wenu wa kutoa huduma bora kwa wananchi, nimeridhishwa na bidii yenu ya usimamizi wa miradi inayoendelea hapa (Ujenzi wa Jengo la Upasuaji, Wodi ya Upasuaji ya Wanaume na Wanawake  n.k) nguvu kazi iliyopo inaonyesha ni kwa namna gani kazi zinafanyika usiku na mchana kwa kufunga taa maeneo ujenzi unakoendelea "amesema Dkt.Mfaume.

Kwa niaba ya watumishi hao  wa afya Kaimu Mganga Mkuu Halmashauri, Dkt.Ernest Msemakweli ameushukuru ujumbe huo kwa pongezi hizo akiahidi kupokea ushauri uliotolewa na ujumbe huo kwa maslahi mapana ya afya kwa jamii.

Sambamba na pongezi hizo Ujumbe huo uliwazawadia watumishi hao kiasi cha Tzs 158,000 ambacho

 kilipokelewa na Mganga Mfawidhi Hospitali ya Halmashauri iliyopo Bukulu Dkt.Alpha Kwilasa kama motisha kwa watumishi hao kutokana na kuridhishwa na utoaji wa huduma za afya katika vituo walivyotembelea.

Miongoni mwa vitu vilivyowavutia ujumbe huo ni pamoja na uwepo wa Picha za kuvutia zenye jumbe elezi kwa watoto na lishe katika wodi yao ambazo husaidia wananchi  na wagonjwa kupata elimu moja kwa moja kitu ambacho ni nadra katika hospitali nyingi nchini, Upatikanaji wa dawa kwa 96% ununuzi wake ukifuata miongozo,mpangilio mzuri,uhuishwaji wa taarifa za dawa kwa wakati,uwepo wa jokofu na ubaridi unaoridhisha Chumba cha Dawa katika hospitali hiyo.

Ziara hiyo ya ukaguzi wa huduma za Afya, Lishe na Ustawi wa jamii inalenga kuwajengea uwezo na weledi wataalam wa afya katika Mkoa wa Dodoma ikiwa katika Halmashauri ya Wilaya ya Kondoa, ujumbe huo umetembelea na kukagua huduma za afya, lishe na ustawi wa jamii zinazotolewa katika Hospitali ya Halmashauri iliyopo Bukulu na Kituo cha Afya Bereko