BARAZA LA MADIWANI LAMPONGEZA MKUU WA DIVISHENI YA KILIMO, MIFUGO NA UVUVI KONDOA DC

Posted on: August 27th, 2024

Baraza la Madiwani Halmashauri ya Wilaya ya Kondoa limempongeza Mkuu wa Divisheni ya Kilimo, Mifugo na Uvuvi Bw.Juvenal Anthony Munishi kwa kusimamia vyema ushiriki wa Halmashauri katika maadhimisho ya wakulima NANE NANE Kimataifa yaliyofanyika katika viwanja vya Nzuguni Dodoma kuanzia tarehe 01 hadi 08 Agosti 2024.

Hiyo ni baada ya Halmashauri kushiriki  Maonesho ya Kimataifa ya Wakulima NANE NANE kwa muda wa siku 8 na kuibuka mshindi wa maonesho hayo kwa nafasi ya pili kati ya Halmashauri 8 za Mkoa wa Dodoma.

Akitoa pongezi na kumkabidhi zawadi kwa niaba ya Baraza la Madiwani, Mwenyekiti wa Halmashauri Mhe.Abdalah Maguo amesema kwa watumishi wengine watakaofanya vizuri wazawadiwe vivyo hivyo na hata kwaWaheshimiwa Madiwani watakaofanya vizuri katika kata zao kwenye usimamizi mzuri wa miradi ya  maendeleo pia wazawadiwe.

Kwa upande wake Mkurugenzi Mtendaji wa Halmashauri ya Wilaya ya Kondoa Ndg.Shaban Millao amesema utoaji wa pongezi kwa mkuu wa Divisheni hiyo ikawe chachu kwa wakuu wengine wa divisheni na vitengo na watumishi wengine katika kufanya kazi kwa ufanisi ili kuwaletea maendeleo wananchi.

Pia Ndg.Millao ameongeza pamoja na halmashauri kupokea tuzo iliyotolewa na Mhe.Dkt Samia Suluhu Hassan,Rais wa Jamhuri ya Muungano wa Tanzania katika kilele cha maonesho ya Wakulima NANE NANE Kimataifa yaliyofanyika viwanja vya Dodoma, uongozi wa Halmashauri umemzawadia cheti cha pongezi na fedha taslimu Sh.Mil 1  Ndg.Juvenal Anthony Munishi kama motisha kutokana na juhudi zake.

Kwa upande wake Ndg.Juvenal Munishi  ametoa shukrani za dhati kwaBaraza la Madiwani kwa kutambua mchango wa Divisheni hiyo, wakiwatia chachu katika ufanyaji  kazi,akishukuru Jitihada za Mhe.Rais Dkt Samia Suluhu Hassan kwa kuboresha mazingira ya ufanyaji kazi kwa maafisa ugani na kuahidi kuongeza bidii ya kuwasaidia wakulima na Wafugaji wa Kondoa.

Sambamba na hilo katika kikao hicho cha Baraza la Madiwani Robo ya Nne kamati za kudumu za halmashauri ziliwasilisha taarifa za utekelezaji wa  shughuli mbalimbali za maendeleo ya Halmashauri kwa kipindi cha robo ya nne mwaka wa fedha 2023/2024.

Wakulima wa Halmashauri ya Wilaya ya Kondoa wamekuwa wakifanya vyema kwa kupokea teknolojia mbalimbali na elimu kuhusu matumizi sahihi ya viatilifu na mbolea kupitia Maafisa Ugani wakileta mabadiliko chanya ya matumizi ya kanuni xa kilimo bora ikiwemo matumizi ya mbolea za viwandani kutoka Tani 320.6 kwa mwaka 2022/2023 hadi Tani 619.5 mwaka 2023/2024.

 Mazao yanayolimwa kwa wingi  Halmashaur ya Wilaya ya Kondoa ni pamoja na Mahindi, Mtama, Uwele, Mbaazi, Dengu, Ufuta na choroko.