BAJETI ZA HALMASHAURI MWAKA 2019/2020 KUHAKIKISHA ZINA AFUA ZA LISHE :TAMISEMI

Posted on: November 23rd, 2018

Ofisi ya Rais-TAMISEMI wameendesha mafunzo ya siku moja katika Wilaya ya Kondoa ikijumuisha wajumbe wa kamati za lishe katika Halmashauri mbili ambazo ni Halmashauri ya Wilaya ya Kondoa na Halmashauri ya Mji wa Kondoa.Wajumbe  walikuwa Mhe. Mkuu wa Wilaya ya Kondoa,Katibu tawala Wilaya,Wenyeviti wa Halmashauri zote mbili,wakurugenzi wa Halmashauri zote,wakuu wa idara na Vitengo.Katika mafunzo hayo wawezeshaji walikuwa Bw.Madaha Malekela(OR-TAMISEMI),Bi.Marian Mwita(Afisa Lishe Mkoa) na Bi Doroth Msimbila(Shirika la Konsonanti) wakishirikiana na wenyeji wao Bi. Evelyne Kabitina,Afisa lishe Halmashauri ya Wilaya-Kondoa na Bi. Dorice Munisi,Afisa lishe Halmashauri ya Mji-Kondoa.Mafunzo hayo yalifanyika katika ukumbi wa Kondoa Irangi wa Halmashauri ya Wilaya ya Kondoa.

Katika ufunguzi wa mafunzo Mkuu wa Wilaya Bi Sezaria V. Makota aliwataka washiriki kuwa wasikivu na kuyazingatia mafunzo kwani mafunzo hayo ni muhimu kwa mustakabali wa jamii ya Kondoa na watanzania kwa ujumla wake.Hii ni kutokana na ukweli kwamba malezi ya watoto kwa kuwapa lishe bora unachangia kwa kiasi kikubwa katika  ukuaji wa mtoto kiakili.

Wakati Bi Doroth Msimbila alipokuwa akiwasilisha mada  ihusianayo na mpango mkakati wa utekelezaji,amefafanua maana halisi ya  lishe kuwa ni  mchakato wa tangu chakula kinapoliwa mdomoni, kinasagwa na kuingia mwilini na kuainisha madhara ayapatayo mtoto anapokosa lishe bora kuwa ni  kupata upungufu wa madini na Vitamini mwilini.Wawezeshaji wote kwa pamoja wamesisitiza juu ya kumuhudumia mtoto katika siku 1000 za kwanza kwani ndio kipindi ambacho ubongo wa mtoto unatengamaa.Hiki ni kipindi kinachoanzia kutungwa kwa mimba hadi umri wa miaka miwili. Kila mara mama au baba anapocheza na kucheka, kusoma kitabu au kushiriki mchezo na mwanawe, ujue kuna maelfu ya hisia chanya zinazojengeka kwenye ubongo wa mtoto huyo mchanga, zinazojenga uwezo wake wa kujifunza, utendaji, kuendana na mabadiliko na hata kukabiliana na changamoto.

Wakati wa kupitisha wajumbe katika uandaaji wa bajeti ya Afya kupitia mfumo wa Planrep,Bw. Madaha amewajulisha wajumbe kuwa Ili kuweza kufanikisha katika kuhakikisha Watanzania wanapata elimu juu ya  Lishe Bora,Serikali imeamua kwamba kwa Halmashauri zote nchini zinapaswa kupanga na kusimamia utekelezaji wa bajeti ya Afya katika afua za Lishe kwa kuzingatia takwimu sahihi za idadi ya watoto chini ya miaka mitano(05) katika wilaya husika.

Wenyeviti wa Halmashauri zote mbili wameshukuru kwa kupata Elimu ya Lishe ambayo kimsingi hawakuwa wanaifahamu kabla ya mafunzo.Wamewataka

Maafisa Lishe Wilaya Kuwashirikisha katika vikao  vinavyohusu lishe bila kujali vinamalipo au havina malipo ili wao kama wawakilishi wa wananchi waweze kuwajulisha wananchi wakiwa katika utekelezaji wa majukumu yao.

Pia imeshauriwa kuifanya ajenda ya Lishe kuwa ajenda ya kudumu kwa viongozi wote wa wilaya ili kuiwasilisha kwa wananchi wakati wowote wanapopata fursa ya kuongea na wananchi au viongozi wa kata au vijiji/mitaa ili kuongeza ufahamu zaidi kwa wananchi juu ya masuala ya lishe bora.

Wakati wa kuhitimisha,washiriki kutoka Halmashauri zote waliweza kuweka mipango ya kutekeleza(way forward) ili kuweza kufikia lengo la kutoa elimu kwa wananchi juu ya Lishe.

HABARI PICHA

Wawezeshaji wakiwa makini kusikiliza maswali toka kwa wajumbe.

Baadhi ya washiriki wakimsikiliza Mwenyekiti wa Halmashauri ya Mji wa Kondoa wakati akizungumza hasa juu ya kushirikishwa katika vikao vya lishe.

Washiriki wakiwa katika picha ya pamoja.