ALMASHAURI YA WILAYA YA KONDOA YATIMIZA AGIZO LA MHE.MAKAMU WA RAIS

Posted on: January 10th, 2025

Mkurugenzi Mtendaji wa Halmashauri ya Wilaya ya Kondoa Ndg.Shaban Millao na Mkuu wa Wilaya ya Kondoa Mhe. Fatma Almas Nyangasa kwa kushirikiana na wananchi wa kijiji cha Hurui wamejumuika pamoja katika zoezi la upandaji miti.

Hayo yamejiri ikiwa ni utekelezaji wa agizo la Makamu wa Rais wa Jamhuri ya Muungano wa Tanzania Mhe.Dkt.Philip Mpango,alipofika mapema Mwezi Agosti 2024 katika zoezi la Uzinduzi wa Daraja la Hurui lililopo katika Kijiji cha Hurui Kata ya Kikore, akiagiza uoteshwaji wa miti pembezoni mwa kingo za daraja hilo.

 Mhe.Nyangassa amesema ni jukumu la wote katika kuitunza miti yote iliyooteshwa katika eneo lote linalozunguka Daraja la Hurui akiwataka kila mmoja awe mwangalizi na mtunzaji wa mazingira kwa kufuata kanuni zote za utunzaji wa mazingira. Miti ipatayo 900 imepandwa katika Bonde la Mto huo, katika eneo la ukubwa wa takriban ekari tatu, lenye upana wa mita 60 toka katika kingo za mto huo. Miti hiyo imetolewa na ofisi ya TFS Wilaya ya Kondoa na kuoteshwa na wananchi wakishirikiana na watumishi wa umma walipo Wilayani Kondoa.

Kwa upande wake Mkurugenzi Mtendaji Ndg.Shaban Millao amewapongeza wananchi hao waliojitokeza kwa wingi katika zoezi hilo la upandaji wa miti,akitumia fursa hiyo kuwahamasisha kupanda na kutunza angalau miti 20 kwa kila kaya katika vijiji vyote 84 na kwa kaya itakayofanya vizuri kuzawadiwa kiasi cha Tsh 50,000/=.

Naye Diwani mwenyeji wa kata ya Kikore Mhe.Ngware ametilia mkazo juu ya kauli mbalimbali za viongozi kuhusu utunzaji wa daraja hilo wananchi kutunza mazingira yanayolizunguka daraja hilo kwani ni msaada mkubwa katika kurahisisha usafiri na usafirishaji na  shughuli nyingine za maendeleo kwa kuiunganisha wilaya ya Kondoa iliyopo Mkoa wa Dodoma na Babati Mkoa wa Manyara.