ZAIDI YA MILIONI 90 ZATOLEWA KWA VIKUNDI VYA WAJASILIAMALI KONDOA DC

Posted on: October 31st, 2024

 Halmashauri ya Wilaya ya Kondoa kupitia Kitengo cha Maendeleo ya Jamii imekabidhi jumla ya Sh.96,070,000 kwa Vikundi 7 vya wajasiliamali ikijumuisha wanawake, vijana na watu wenye ulemavu.

Akikabidhi hundi ya mfano ya malipo kwa vikundi hivyo mgeni rasmi wa hafla hiyo Mkuu wa Wilaya ya Kondoa Mhe.Fatma Nyangassa amempongeza Mhe.Rais Dkt Samia Suluhu Hassan kwa kuruhusu uendelezwaji wa kutoa mikopo ya 10% baada marekebisho muhimu kufanyika  ambayo awali ilisitishwa.

"Sisi kama viongozi tuna kazi kubwa ya kuwaelimisha wananchi wetu juu ya mikopo hii tukijiridhisha kwa kupata taarifa sahihi zinazohitajika kwa waombaji wa mikopo ili watu wengi zaidi wanufaike nayo kama ilivyo dhamira ya Mhe.Rais ya kuwezesha watanzania wengi katika masala ya kiuchumi.

Kwa upande wake Mwenyekiti wa Halmashauri Mhe.Abdalah Maguo ameviasa vikundi hivyo kuzitumia fedha kikamilifu katika vikundi vyao na kufanya marejesho kwa wakati ili na vikundi vingine vipya vinufaike.

Naye Mkurugenzi Mtendaji wa Halmashauri Ndg.Shaban Millao amesema,  Halmashauri ya wilaya ya kondoa imejipanga kuhakikisha uchumi wa wananchi wake unaimarika ukiwazingatia vijana, wanawake na watu wenye mahitaji maalum kupitia njia mojawapo ya mikopo ambapo kiasi cha fedha Sh 222,398,512.35 zimetengwa kama sehemu ya 10%ya mapato ya ndani zilizoanza kutengwa tangu mwaka wa fedha wa 2022/2023.

Awali katika taarifa yake Afisa Maendeleo ya Jamii Halmashauri Bi.Raiya Nasser amesema mikopo hiyo ilisitishwa na Serikali mwezi April 2023 na kupewa idhini ya kuendelea nchini mwezi Septemba 2024 ikihimiza  uhamasishaji wananchi kuanza kuomba mikopo katika  halmashauri, huku vikundi 7 vikikidhi vigezo vyote  muhimu na kuwapa mafunzo toshelevu dhidi ya usimamizi bora wa miradi yao, uwekaji akiba n.k.

Kwa upande wa vikundi vilivyopata mkopo huo  wamemshukuru Mhe.Rais Dkt.Samia Suluhu Hassan kwa kuridhia zoezi la utoaji mikopo kuendelea, wakiahidi kuzitumia kwa malengo husika na kuhakikisha wanarejasha kwa wakati.

Vikundi vilivyonufaika na mkopo huo kwa dirisha la kwanza ni pamoja na Vikundi vya Wanawake (Matumaini-Itololo, Mtakuja-Kikilo,Tanzanite-Haubi),Vijana (Uhakika-Bereko,Vijana Electronics-Kisese) Watu wenye Ulemavu (Watu wenye Ulemavu JKwadelo, Nyota-Mnenia).