WITO DHIDI YA HAMASA YA ULAJI MLO KAMILI KWA JAMII WATOLEWA KONDOA DC

Posted on: July 1st, 2025

Agizo kwa Wataalam ngazi ya Kata limetolewa dhidi ya Uhamasishaji kwa jamii juu Uzingatiaji wa Mlo Kamili.

Hayo yamebainishwa mapema Juni 28, katika kikao cha tathmini ya utekelezaji wa lishe kilichowakutanisha Maafisa Watendaji wa Kata na wataalam wa lishe ofisi ya Mkurugenzi Mtendaji wa Halmashauri ya Wilaya ya Kondoa pamoja na Uongozi wa Ofisi ya Mkuu wa Wilaya ya Kondoa.

Akiongoza Kikao hicho kwa niaba ya Mkuu wa Wilaya ya Kondoa, Katibu Tawala Bi.Christina Kalekezi amehimiza wazazi kuchangia chakula  mashuleni kwa ajili ya kuongeza usikuvu darasani, Kupunguza Utoro, Utengenezaji wa  afya ya wanafunzi.

"Suala la lishe ni suala endelevu na linabeba hatma ya Taifa letu, jamii inapaswa kuhamasishwa kuchangia chakula  mashuleni, tutumie fursa hii kutoa elimu kupitia mikutano mbalimbali pamoja na kupita nyumba kwa nyumba."alisema Bi.Kalekezi.

Bi.Kalekezi amewaagiza wakuu wa shule za Msingi na Sekondari kuwajibika katika usimamizi wa kusaga chakula (mahindi) katika viwanda vilivyofungwa mashine ya virutubisho vilivyopo karibu na kata zao ambapo kati ya kata 21 kata 8 zimenufaika na ufungwaji wa mashine za kurutubisha unga pamoja na kuwataka watendaji wa kata kuhakikisha kuwa  wanaripoti kwa wakati taarifa za lishe.

Kikao hiki ni maalum kwa ajili ya kupokea na Kujadili taarifa ya utekelezaji wa afua za lishe kwa kipindi cha robo ya tatu (Januari-Machi) ambapo jumla ya Tzs 26,068,722/= zilitengwa kutekeleza shughuli za lishe.