WATAALAM WA ELIMU KONDOA DC WAPIGWA MSASA KWA VITENDO ELIMU YA UOTESHAJI MICHE YA MITI

Posted on: July 12th, 2025

Wataalam wa Elimu Halmashauri ya Wilaya ya Kondoa wamejengewa uwezo juu ya uoteshaji wa miti ya matunda na kivuli kwa vitendo.

Mafunzo hayo yamefanyika  katika Chuo cha Ualimu Bustani yakiwakutanisha Maafisa Elimu Kata na Walimu Wakuu wa shule za msingi halmashari yakiongozwa na Kitengo cha Maliasili na Hifadhi ya Mazingira.

Akiendesha mafunzo hayo Afisa Misitu Halmashauri Ndg.Clement Kabeni amesema kuna faida nyingi tunazipata kwa kuotesha na kutunza miti ya kivuli na matunda,akiwafundisha wataalam hao namna bora ya upandaji na utunzaji wa miti ya matunda ya muda mfupi ikiwa ni sehemu ya maandalizi ya mapokezi ya miti hiyo.

Kwa upande wake Mkuu wa Divisheni ya Elimu Awali na Msingi Mwl.Eugen Shirima amekipongeza kitengo cha Maliasili na hifadhi ya Mazingira kwa elimu walioitoa kwa wataalamu hao,akiahidi utekelezaji wake katika shule zote za msingi ambapo siku chache zijazo zoezi la usambazaji wa  miche ya miti ya matunda 100 kwa kila shule litaanza.

" Kupitia mradi wa Shule Bora katika Halmashauri yetu,shule zetu za Msingi zitanufaika kwa kupewa miti ya matunda 100 kwa kila Shule ambapo hadi sasa taratibu za manunuzi zimefanyika katika chuo cha Sokoine-Morogoro, nielekeze kwenu wataalam wa elimu kuhakikisha mnaitunza miti hiyo itakapofika kwenye shule zetu sambamba na uzingatiaji wa elimu ya upandaji Miti tuliyoipata leo"alisema Mwl.Shirima.

Halmashauri ya Wilaya ya Kondoa imejiwekea mkakati madhubuti wa kuhakikisha taasisi zote za umma zinatekeleza azma ya Serikali ya Awamu ya Sita chini Mhe.Rais Dkt.Samia Suluhu Hassan katika utekelezaji wa viashiria vya mkataba wa lishe kwa watoto mashuleni kwa upandaji na utunzaji wa miti ya matunda.

Sanjari na mikakati hiyo halmashauri imeanzisha vitalu mbalimbali vya miche ya matunda na kivuli vilivyopo katika viwanja vya jengo la utawala pamoja na ushirikiano madhubuti na Wakala wa Huduma za Misitu Tanzania (TFS-Kondoa),Mashirika yasiyo ya kiserikali ya Inades Formation Tanzania na Green Africa katika kuhakikisha Halmashauri ya Wilaya ya Kondoa inakijanishwa kwa utunzaji wa mazingira ikiwa zaidi ya miti Elfu 37 imepandwa.