"WANAWAKE WENZANGU JITOKEZENI KUWANIA NAFASI ZA UONGOZI KATIKA UCHAGUZI WA SERIKALI ZA MITAA MWAKA 2024" RC ROSEMARY SENYAMULE

Posted on: August 28th, 2024

Mkuu wa Mkoa wa Dodoma Mhe.Rosemary Senyamule amewataka wanawake nchini kujitokeza kwa wingi kuwania nafasi za uongozi katika Uchaguzi wa Serikali za Mitaa utakaofanyika tarehe 27 Novemba 2024.

Mhe.Senyamule ameyasema hayo alipokua katika Uzinduzi wa Tamasha la Saba la Jinsia ngazi ya Wilaya-Viwanja vya Sabasaba Kondoa Mjini lililoandaliwa na Mtandao wa Kijinsia Nchini (TGNP) pamoja na Washirika wanaotetea Haki za Wanawake Nchini akisema "wanawake wenzangu wote tujitokeze kugombea nafasi za uongozi kwa sababu yupo mwanamke Mhe.Rais Dkt.Samia Suluhu Hassan ameonyesha kuwa wanawake wanaweza,ni imani yangu wanawake wengi mtajitokeza kuwania nafasi za uongozi tukiiga mfano kwa Mhe.Dkt Samia Suluhu Hassan ambaye jamii imejionea kazi kubwa aliyoifanya."

"Ili usawa wa kijinsia ufikiwe ni lazima wanawake tuchukue hatua,mazingira rafiki yamewekwa hivyo kazi ni kwetu kupambana tuchukue hatua za kugombea na kuingia katika ngazi za maamuzi"ameongeza Rc Senyamule.

Pia Mhe.Senyamule ameongeza kwa kusema serikali imeendelea kufanya jitihada mbalimbali kutekeleza mpango kazi wa Beijing kufikia usawa wa kijinsia ambapo kwa sasa wanawake wengi wameshika nafasi za uongozi Mhe.Rais akifanya teuzi kwa wanawake kwa nafasi mbalimbali zikiwemo  mawaziri,makatibu,wakuu wa mikoa na wilaya n.k

Kwa upande wake Mkurugenzi Mtendaji wa TGNP Bi.Lilian Liundi amesema suala la usawa wa kijinsia ni suala la maendeleo akiwahamasisha wananchi kutoa maoni yao kwenye Dira ya Taifa 2050 ajili ya mwelekeo wa taifa miaka 25 ijayo kwa kuzingatia haki na usawa wa kijinsia.

 Bi.Lilian ameongeza akisema tamasha hilo ni la siku tatu kuanzia Agosti 27 hadi 29 likiongozwa na mada kuu "Dira jumuishi ya 2050 :Miaka 30 baada ya Beijing tujipange ikishirikisha Wanaharakati na Wadau zaidi ya 300 wanaotetea haki za wanawake na usawa wa kijinsia kutoka maeneo mbalimbali nchini.

Naye Mwenyekiti wa Bodi ya TGNP Bi.Gemma Akilimali amesema Tamasha la kijinsia ni moja ya majukwaa ya TGNP katika ujenzi wa nguvu ya pamoja,jukwaa likiwa ni la wazi kwa ajili ya wanawake na wadau wa haki za binadamu wakikutana kila baada ya mwaka mmoja kubadilishana mawazo.

Uchaguzi wa Serikali za Mitaa Nchini unatarajiwa kufanyika tarehe 27 Novemba 2024,nafasi mbalimbali zikiwaniwa zikiwemo Mwenyekiti wa Kijiji,Wajumbe wa Halmashauri ya Kijiji(Kundi mchanganyiko la Wanawake na Wanaume),Mwenyekiti wa Mtaa na wajumbe wa ya mtaa(Kundi mchanganyiko la wanawake na wanaume),Mwenyekiti wa Kitongoji na wajumbe wa mamlaka za miji midogo.