VIONGOZI WA ELIMU NA WAKUU WA SHULE ZA MSINGI NA SEKONDARI KONDOA DC WANOLEWA KUHUSU MFUMO WA UTHIBITI UBORA WA SHULE KIDIGITALI

Posted on: May 14th, 2025

Jumla ya Wataalam 306 wa elimu ikihusisha Viongozi wa Elimu Ngazi ya Halmashauri ambao ni Wathibiti Ubora wa Shule, Maafisa Elimu Kata, Wenyeviti Udhibiti Ubora wa shule pamoja na Wakuu wa Shule za Msingi na Sekondari Halmashauri ya Wilaya ya Kondoa wameshiriki mafunzo ya mfumo wa kidijitali wa Uthibiti Ubora wa Shule.

Mafunzo hayo yamefanyika mapema Mei 8 na 9 katika Ukumbi wa Mikutano Kondoa Irangi uliopo Kondoa Mjini yakilenga kuwajengea uwezo Wataalam hao namna ya kufanya tathimi ya ubora wa taaluma, mazingira ya shule, ushirikishwaji wa jamii, Usimamizi wa Shule, Mitaala, Utamaduni na Maadili.

Akifunga mafunzo hayo Ndg. Moshi Samaitu ambaye ni Mthibiti Mkuu wa Ubora wa Shule Halmashauri ya Wilaya ya Kondoa, amewataka wataalam hao kufanya mrejesho ngazi ya shule ili kila mwalimu aelewe matumizi ya Mfumo wa kidijitali wa Uthibiti Ubora wa Shule, Uundwaji wa kundi sogozi (WhatsApp Group) katika kujengeana uwezo dhidi ya mfumo na kuimarisha timu za Uthibiti Ubora wa ndani.

Akizungumza kwa niaba ya wataalam hao Ndg.Fadhili Mwijaku ambaye ni Afisa Elimu Kata ya Kikore amewashukuru waandaaji wa mafunzo hayo, amesema yatarahisisha kuwapunguzia gharama ya kwenda katika Ofisi za Uthibiti Ubora na kwa sasa mambo yote yanaishia kwenye mfumo.

Wepesi wa mafunzo hayo umerahisishwa na uwepo wa matumizi ya vifaa vya usaidizi katika kufanikisha mafunzo kwa wataalam hao yakifanyika kwa kutumia Vishikwambi na Routers ambavyo vimetolewa na Serikali ya Awamu ya Sita katika shule zote za Umma ili kurahisisha Shughuli za wataalam hao.

Umuhimu wa Mafunzo haya unalenga kusaidia usimamizi wa shule kuanzia ngazi ya shule hadi taifa itakayosaidia mifumo kusomana, Uokoaji wa muda katika utoaji wa taarifa, Uokoaji wa gharama pamoja na Utumikaji wa teknolojia katika utoaji wa elimu bora.