VIONGOZI OFISI YA MAKAMU WA PILI WA RAIS ZANZIBAR WATEMBELEA MIRADI INAYOFADHILIWA NA FEDHA ZA MFUKO WA JIMBO-KONDOA DC

Posted on: May 3rd, 2025

Viongozi kutoka Ofisi ya Makamu wa Pili wa Rais wa Zanzibar wamefanya ziara ya kujifunza namna ya Utekelezaji na Uratibu wa Fedha za Mfuko wa Kuchochea Maendeleo ya Jimbo  katika Halmashauri ya Wilaya ya Kondoa Mkoani Dodoma.

Ujumbe huo umepokelewa na timu ya wataalam kutoka Ofisi ya Mkurugenzi Mtendaji wa Halmashauri ya Wilaya ya Kondoa ukiwajumuisha Wakuu wa Divisheni na Vitengo wa Fedha, Mipango, Ukaguzi na Manunuzi wakiongozwa na Kaimu Mkurugenzi Mtendaji Ndg.Justice Shemakange ambaye aliwapokea katika Ofisi ya Mkurugenzi-Bukulu na kisha kuwapeleka katika Mradi wa Ujenzi wa Shule Shikizi ya Msiyauti kata ya Mnenia iliyotekelezwa kwa fedha za Mfuko wa Jimbo la Kondoa na Nguvu za Wananchi.

Akiongoza Ujumbe huo, Naibu Katibu Mkuu Ofisi ya Makamu wa Pili wa Rais Zanzibar Ndg.Salhina Mwita Ameir amesema lengo la ziara hiyo ni kujengewa uelewa juu ya Usimamizi wa utekelezaji wa Fedha za Mfuko wa kuchochea Maendeleo ya Jimbo VisiwaniZanzibar.

Wakiwa ziarani ujumbe huo wapata uzoefu katika suala la Uibuaji wa Miradi ya Maendeleo na Upitishaji wa Vipaumbele, Usimamizi na Uendeshaji wa kamati za fedha za kuchochea Mfuko wa Maendeleo ya Jimbo (CDCF Communities), Uzoefu katika namna ya Ufungaji wa Hesabu na Hoja za Ukaguzi, Usimamizi wa Sheria ya Fedha za Mfuko wa Kuchochea Maendeleo ya Jimbo na Utekelezaji wa Mwongozo wa Ununuzi kwa kutumia fedha za Mfuko wa Maendeleo ya Jimbo.

Akihitimisha ziara hiyo Ndg.Salhina Mwita amesema "Tunawashukuru na kuwapongeza  Ofisi ya Mkurugenzi Halmashauri ya Wilaya ya Kondoa kwa namna mlivyojipanga katika ziara hii na sisi tumeridhika, tumeona na kujifunza mengi na mradi tuliouona unaendana na mahitaji ya jamii ambao utekelezaji wake umezingatia ufanisi mkubwa vivyo hivyo na jamii inaendelea kushajihika kuona shule inaendelea vizuri, muendeleze hizo jitihada na sisi tumejifunza tunaahidi kuyafanyia kazi. "

Akipokea shukrani hizo kaimu Mkurugenzi Ndg.Justice Shemakange,  amewapongeza kwa kuichagua kondoa kuja kujifunza kwa kubadilishana uzoefu na kuahidi  kupokea na kuufanyia Kazi ushauri uliotolewa na ugeni huo.

Ziara hiyo ni matokeo chanya ya Muungano yakichochea mahusiano yaliyotukuka kutokana na waasisi wa Muungano Hayati Baba wa Taifa Mwl.Julius K.Nyerere na Hayati Sheikh Amani Abeid Karume aliyekuwa Rais wa kwanza wa Serikali ya Mapinduzi ya Zanzibar.