UWAJIBIKAJI, UTU, UZALENDO NA UMOJA VYATILIWA MKAZO KONDOA DC

Posted on: May 22nd, 2024

Halmashauri ya Wilaya ya Kondoa kupitia Kikao cha Baraza la Madiwani Robo ya Tatu mapema tarehe 22/05/2024 imepokea,kujadili na kutoa maelekezo ya taarifa mbalimbali za kamati za kudumu za HalmashauriyaWilaya ya Kondoa.

Katika kikao hicho suala la Uwajibikaji, Umoja, Utu na Uzalendo vimetiliwa mkazo kwa Waheshimiwa Madiwani, Wakuu wa Idara na Vitengo, Watumishi pamoja na Wananchi kwa kuvifanyia kazi kwa maslahi ya maendeleo ya Halmashauri na Taifa kwa ujumla.

Kwa niaba ya Mkuu wa Wilaya ya Kondoa, Katibu Tawala Wilaya Bi.Christina Kalekezi amesema "kuna kila sababu za kuimarisha mahusiano mazuri baina ya Viongozi,Watumishi na Wananchi ili kuongeza kasi ya kukua kwa shughuli za kimaendeleo katika halmashauri zitakazochangia kuongeza pato la halmashauri.

Bi kalekezi amehimiza bidiii ya pamoja inahitajika katika ukusanyaji wa Mapato, uimarishaji wa udhibiti wa mianya ya upotevu wa mapato na ubunifu wa vyanzo vipya vya ukusanyaji mapato kuendelea.

Kwa Upande wake Mkurugenzi Mtendaji wa Halmashauri Ndg.Shaban Millao amesema kwa niaba ya watumishi ameshukuru Michango ya Waheshimiwa Madiwani kwa kuongeza tija katika utekelezaji wa majukumu ya kila siku,akiongeza msimamo wa halmashauri katika utatuzi wa kero mbalimbali za wananchi katika ngazi zote kupitia uwekaji namba za watumishi viongozi katika mbao za matangazo na milangoni wakizingatia kauli mbiu isemayo "KERO YAKO WAJIBU WANGU ".

Akihitimisha kikao hicho Mwenyekiti wa Kikao ,Makamu Mwenyekiti wa Halmashauri Mh.Salum Mabote amesema wamepokea maelekezo na ushauri uliotolewa na Baraza la Madiwani na kuahidi kuyafanyia kazi kwa lugha moja.

Kikao hicho ni cha Robo ya Tatu kwa mwaka wa fedha 2023/2024 ambapo Baraza la Madiwani limepokea na kujadili taarifa za utekelezaji kazi kutoka katika kamati za kudumu za halmashauri ikizijumuisha Kamati ya Uchumi,Ujenzi na Mazingira, Kamati ya Elimu Afya na Maji,Kamati ya Kudhibiti Maambukizi ya Virusi vya Ukimwi pamoja Kamati ya Fedha,Uongozi na Mipango.