TIMU YA WARAGHBISHI WILAYA KONDOA NA CHEMBA WATIA NANGA SEKONDARI YA NTOMOKO

Posted on: March 11th, 2025

Timu ya Waraghbishi Wilaya ya Kondoa na Chemba kwa kushirikiana na Mtandao wa Kijinsia Nchini(TGNP)&The Aghakan Foundation chini ya Ufadhili wa Ubalozi wa Ireland Nchini wameadhimisha Wiki ya Wanawake katika Shule ya Sekondari Ntomoko kata ya Haubi Halmashauri ya Wilaya ya Kondoa.

Akiongoza Ujumbe huo Afisa Maendeleo ya Jamii Halmashauri Bi.Elizebert Shoo amesema ujumbe huo umelenga kuadhimisha wiki ya wanawake wakishiriki kutoa elimu juu ya masuala Wanawake,Wasichana na Jamii pamoja na Upandaji miti 1000 katika Shule ya Msingi na Sekondari Ntomoko kwa kujumuika na baadhi ya wananchi na wanafunzi shuleni hapo.

"Katika Maadhimisho haya tumekua na shughuli mbalimbali ikiwemo utoaji elimu kupitia redio na kuifikia jamii yetu tukigusia haki na wajibu kwa wanawake,wasichana na jamii kwa ujumla katika kuikomboa jamii na kuleta maendeleo endelevu".amesema Bi.Shoo.

Bi.Shoo amesema katika mwendelezo wa wiki ya wanawake kwa siku ya tarehe 04/03/2025 kutakua na kliniki ya msaada kisheria kata ya Kwadelo kwa kutoa elimu na kusikiliza changamoto mbalimbali kwa kushirikiana na Taasisi ya JUST PARALEGALS na kuhitimisha kiwilaya tarehe 06/03/2025 kata ya Bereko kwa kufanya matendo ya huruma kwa Mwanamke Mjane na watoto wenye ulemavu anaowalea kwa kumpa mtaji anzia,ufanyaji Bonanza pamoja na utoaji wa elimu kwa jamii katika siku hiyo.

Naye Bw.Rubengo ambaye ni Msimamizi wa Mradi wa "Pamoja Tuinuke "unaosimamiwa na Taasisi ya The Aghakan Foundation &Mtandao wa Kijinsia Nchini (TGNP)chini ya ufadhili wa Ubalozi wa Ireland Nchini amesema kupitia elimu walioitoa kwa wanafunzi hao utakwenda kuleta mwelekeo chanya kwa ustawi wa jamii utakaobadilisha dhana potofu ili kuwepo na usawa.

Maadhimisho hayo kitaifa yanatarajiwa kufanyika Mkoani Arusha siku ya tarehe 08/03/2025 Mgeni rasmi akitarajiwa kuwa Rais Mhe.Dkt Samia Suluhu Hassan yakibebwa na kauli mbiu isemayo: Wanawake na Wasichana 2025 tuimarishe haki,usawa na uwezeshaji.