TANI 20 ZA CHOKAA YA KILIMO KUNUFAISHA WAKULIMA KONDOA DC

Posted on: August 19th, 2024

Halmashauri ya Wilaya ya Kondoa kwa kushirikiana na Shirika lisilo la kiserikali ONE ACRE FUND  imekabidhi jumla ya Tani 20 za Chokaa ya Kilimo kwa Wakulima 66 kutoka katika Kata za Soera, Salanka, Kikilo na Bereko.

Hii ni baada ya baadhi ya Wakulima wa Halmashauri ya Wilaya ya Kondoa kupimiwa Sehemu ya Udongo wa mashamba yao kwa lengo la utambuzi wa mazao yapi yanafaa kulimwa katika mashamba yao kupitia kifaa maalum cha kupimia Afya ya Udongo.

Akieleza kwa niaba ya Shirika hilo Bw.Salehe Joram alipomtembelea Mkurugenzi Mtendaji Halmashauri ya Wilaya Kondoa Ndg.Shaban Millao ofisini kwake Bukulu, amesema lengo la kukabidhi Chokaa ya Kilimo kwa wakulima hao ni kuongeza thamani ya Udongo ili kuchochea kilimo chenye tija kwa Mkulima mdogo.

Kwa upande wake Mkurugenzi Mtendaji wa Halmashauri ya Wilaya ya Kondoa Ndg.Shaban Millao amesema jitihada za Serikali ya awamu ya sita zimechangia kiasi kikubwa kumsaidia mkulima wa Kondoa, baada ya halmashauri kupokea vifaa maalum vya kupimia afya ya udongo lengo likiwa ni kumsaidia Mkulima kutambua ni mazao yapi sahihi kwa shamba husika.

Awali akitoa tathmini ya taarifa ya afya ya udongo kupitia sampuli za udongo zilizopimwa kwa kutumia na vifaa hivyo baada ya kuanza kutumika, Mkuu wa Divisheni ya Kilimo, Mifugo na Uvuvi Bw.Juvenal Munishi amesema jumla ya sampuli 407 kati ya 820 ziligundulika kuwa na tindikali kwa kiasi kikubwa (Soil Ph) inayochangia mimea kutokukua vyema kwa maana ya kukosa virutubishi muhimu kwa ukuaji wa mimea mashambani.

Pia kwa upande wa wakulima toka kata nufaika za Soera, Salanka, Kikilo na Bereko wameshukuru jitihada zat Serikali kwa kushirikiana na mdau huyo wakiahidi kuitumia Chokaa hiyo kwa matumizi lengwa  ili kuongeza tija kwenye kilimo cha kisasa.

 Chokaa ya kilimo ni mchanganyiko wa madini na virutubisho vinavyosaidia ukuaji wa mimea na urekebishaji wa rutuba ya Udongo.